न्यूयार्क: मायक्रोसॉफ्टच्या सर्व्हरमधील बिघाडामुळे संपूर्ण जगाला मोठ्या तांत्रिक संकटाचा सामना करावा लागत आहे. दिल्ली, मुंबईसह परदेशातील विमानसेवेवरही परिणाम झाला आहे. ही समस्या प्रथम अमेरिकेच्या फ्रंटियर एअरलाइन्समध्ये आली आणि हळूहळू ती जगभर पसरली.
ताज्या माहितीनुसार, मायक्रोसॉफ्टशी संलग्न सायबर सिक्युरिटी फर्म क्लाउड स्ट्राइकने आपली चूक मान्य केली आहे, ज्यामध्ये म्हटले आहे की क्लाउड स्ट्राइकला अँटी-व्हायरस अपडेट करणे आवश्यक होते, जे कंपनी वेळेवर करू शकली नाही, ज्यामुळे जगाला या आयटी संकटाचा सामना करावा लागत आहे.
मायक्रोसॉफ्टकडून निवदेन जारी
मायक्रोसॉफ्टने या संपूर्ण संकटाबाबत आपले पहिले स्टेटमेंट जारी केले आहे. ज्यात असे म्हटले आहे की, “आमचे विशेषज्ञ शक्य तितक्या लवकर समस्येचे निराकरण करण्याचा प्रयत्न करीत आहेत आणि लवकरच अधिक अद्यतने प्रदान करतील.”
दिल्ली विमानतळानेही सर्व्हरच्या खराबीबाबत एक निवेदन जारी केले आहे. जागतिक आयटी संकटामुळे हवाई सेवेवर परिणाम झाला असून, प्रवाशांची होणारी गैरसोय दूर करण्याचा प्रयत्न सुरू असल्याचे विमानतळ प्रशासनाने म्हटले आहे.
कोणत्या सेवा आणि देश प्रभावित ?
अनेक देशांमध्ये, ऑनलाइन माध्यमातून पुरवल्या जाणाऱ्या विमान सेवा, रुग्णालये, स्टॉक एक्सचेंज, रेल्वे सेवा, प्रसारण सेवा इत्यादींसह अनेक प्रकारच्या आपत्कालीन सेवांवर परिणाम झाला आहे. सिडनी, नेदरलँड, दुबई, बर्लिनसह अनेक ठिकाणी हवाई सेवा प्रभावित झाली आहे. सर्व मोठ्या शहरांतील विमानतळांवर शेकडो प्रवासी असल्याने त्यांना उड्डाणाची कोणतीही माहिती मिळू शकलेली नाही. या आयटी संकटामुळे तिकीट बुकिंग आणि चेकिंग होत नाहीये.
स्काय न्यूजचे थेट प्रक्षेपण ब्रिटनमध्ये थांबले आहे. लंडन स्टॉक एक्सचेंज आणि सेंट्रल बँक ऑफ इस्रायललाही याचा फटका बसला आहे. मायक्रोसॉफ्टच्या सर्व्हरमधील दोषाचा परिणाम ब्रिटिश रेल्वे आणि ब्रिटनच्या रेल्वे सेवांवरही दिसून आला आहे. भारताबद्दल बोलायचे झाले तर दिल्ली, मुंबई, हैदराबादसह अनेक शहरांमध्ये हवाई वाहतुकीवर परिणाम झाला आहे. आता दिल्ली आणि हैदराबाद विमानतळांवर प्रवाशांना मॅन्युअल तिकिटे दिली जात आहेत. सिंगापूर विमानतळावर मॅन्युअल चेक-इन आणि बुकिंगही सुरू करण्यात आले आहे.
