तेहरान/वॉशिंग्टन: गेल्या 24 तासांत मध्य-पूर्वेतील (Israel Vs Iran War) संघर्षाने अत्यंत भीषण वळण घेतले आहे. सलग दुसऱ्या दिवशी अमेरिका आणि इस्रायलच्या संयुक्त फौजांनी इराणवर आतापर्यंतचा सर्वात मोठा हवाई हल्ला चढवला. बी-२ बॉम्बरच्या सहाय्याने इराणच्या 30 हून अधिक लष्करी तळांवर तब्बल 1,200 हून अधिक बॉम्बचा वर्षाव करण्यात आला असून, राजधानी तेहरानसह अनेक शहरे धुराच्या लोटात हरवली आहेत. या कारवाईत आतापर्यंत 216 जणांचा मृत्यू झाला असून मृतांचा आकडा वाढण्याची भीती आहे.
युद्धाची ठिणगी का पडली?
हे युद्ध अचानक उद्भवलेले नाही. 2025 पासून इस्रायलने इराणला त्यांच्या अण्वस्त्र कार्यक्रमाबाबत वारंवार इशारे दिले होते. “इराणला अण्वस्त्र सज्ज होऊ देणार नाही,” ही इस्रायलची स्पष्ट भूमिका होती. मात्र, इराणने क्षेपणास्त्र चाचण्या आणि अण्वस्त्र प्रक्रिया सुरूच ठेवल्यामुळे अखेर अमेरिकेच्या साथीने इस्रायलने ‘प्रि-एम्प्टिव्ह स्ट्राईक’ (प्रतिबंधात्मक हल्ला) करण्याचा निर्णय घेतला. अमेरिकन राष्ट्राध्यक्ष डोनाल्ड ट्रम्प यांनी तर दावा केला आहे की, या हल्ल्यात इराणच्या सर्वोच्च नेत्यांसह 48 प्रमुख नेत्यांचा खात्मा करण्यात आला आहे.
हे युद्ध लांबल्यास पुरवठा साखळी विस्कळीत होऊन जीवनावश्यक वस्तूंच्या किमती वाढू शकतात. लेबनॉनने इराणच्या बाजूने युद्धात उडी घेतल्याने हा संघर्ष संपूर्ण आशियाला कवेत घेण्याची चिन्हे आहेत. पंतप्रधान नरेंद्र मोदी यांनी या परिस्थितीवर चिंता व्यक्त करत इस्रायलशी संवाद साधला आहे, कारण या तणावाचा थेट परिणाम भारताच्या ऊर्जा सुरक्षेवर होणार आहे. पुढील काही आठवडे जागतिक बाजारपेठेत मोठी अस्थिरता राहणार असल्याचे स्पष्ट दिसत आहे.
