India Pakistan: श्रीनगर : आंतरराष्ट्रीय स्तरावर अमेरिका, इस्रायल आणि इराण यांच्यातील तणावाकडे जगाचे लक्ष लागले असताना जम्मू-काश्मीर सीमाभागात पुन्हा एकदा हालचाल वाढल्याचे दिसून आले आहे. जम्मू-काश्मीर मधील नियंत्रण रेषेवर पाकिस्तानकडून ड्रोनद्वारे घुसखोरीचा प्रयत्न करण्यात आल्याची माहिती समोर आली आहे. भारतीय जवानांनी तत्काळ कारवाई करत हा प्रयत्न हाणून पाडला. (Poonch Drone Intrusion)
मिळालेल्या माहितीनुसार, रविवारी सकाळी सुमारे 6 वाजून 10 मिनिटांनी पुंछ जिल्ह्यातील दिगवार सेक्टरमध्ये तैनात असलेल्या जवानांना एक संशयित ड्रोन भारतीय हद्दीत फिरताना दिसले. हे ड्रोन पाकिस्तानच्या बाजूने नियंत्रण रेषा ओलांडून आत आले होते. परिस्थितीची गंभीरता ओळखून जवानांनी तात्काळ गोळीबार केला. जोरदार प्रत्युत्तर मिळाल्यानंतर संबंधित ड्रोन पुन्हा पाकव्याप्त काश्मीरच्या दिशेने परत गेल्याची माहिती आहे.
तीन दिवसांत दुसरा प्रयत्न
गेल्या तीन दिवसांतील हा दुसरा प्रयत्न असल्याने सीमाभागात तणाव वाढला आहे. 27 फेब्रुवारी रोजीही अशाच प्रकारे ड्रोनद्वारे प्रवेश करण्याचा प्रयत्न झाला होता. त्यामुळे सुरक्षा यंत्रणा अधिक सतर्क झाली आहे. ड्रोनच्या माध्यमातून शस्त्रास्त्रे किंवा अंमली पदार्थांची तस्करी होण्याची शक्यता लक्षात घेऊन परिसरात शोधमोहीम सुरू करण्यात आली आहे. दिगवार आणि आसपासच्या भागात कडक बंदोबस्त ठेवण्यात आला असून प्रत्येक हालचालीवर बारकाईने लक्ष ठेवले जात आहे.
