Hyderabad Fire: हैदराबाद: दिवाळीच्या मुहूर्तावर हैदराबादमध्ये एक मोठी दुर्घटना घडली असून त्यात 9 जणांचा मृत्यू झाला आहे. हैदराबाद (टीएस) येथील केमिकल गोदामाला लागलेल्या आगीत 9 जणांचा मृत्यू झाला आहे. आग इतकी भीषण होती की ती चार मजल्यापर्यंत पसरली.
अधिक माहिती देताना सेंट्रल झोनचे डीसीपी व्यंकटेश्वर राव यांनी सांगितले की, हैदराबाद येथील बाजारघाट, नामपल्ली येथील एका अपार्टमेंट कॉम्प्लेक्समध्ये असलेल्या गोदामाला लागलेल्या आगीत 9 जणांचा मृत्यू झाला आहे. तर 16 जण किरकोळ जखमी होऊन सुखरूप बचावले. तेलंगणाचे मुख्यमंत्री केसी राव यांनी नामपल्ली आगीत झालेल्या मृत्यूबद्दल शोक व्यक्त केला आहे. मुख्यमंत्र्यांनी संबंधित अधिकाऱ्यांना तातडीने सर्व उपाययोजना करण्याचे आदेश दिले आहेत.
इमारतीमध्ये रासायनिक पदार्थांचा साठा
हैदराबाद च्या नामपल्ली पोलीस स्टेशन हद्दीतील एका गोदामात ही घटना घडली. दरम्यान, अग्निशमन दलाच्या तीन गाड्यांसह जवान आगीवर नियंत्रण मिळवत आहेत. डीजी (अग्निशमन सेवा) नागी रेड्डी म्हणाले, “इमारतीमध्ये केमिकल्सचा बेकायदेशीररीत्या साठा करण्यात आला असावा. इमारतीच्या स्टिल्ट एरियामध्ये केमिकल्सचा साठा करण्यात आला होता आणि या केमिकल्समुळे आग लागली होती. एकूण 21 जणांना वाचवण्यात आले. 9 जणांचा मृत्यू झाला, तर 6 जणांवर उपचार सुरू आहेत. सर्व लोकांना अपार्टमेंट इमारतीतून बाहेर काढण्यात आले आहे.
असा झाला हा अपघात
प्राथमिक तपासात कार रिपेअरिंगदरम्यान स्पार्किंग होऊन आग लागल्याचे पोलिसांना आढळून आले. आगीवर नियंत्रण मिळवण्यात आले असून, जखमींना रुग्णालयात दाखल करण्यात आले आहे. सध्या पोलिसांनी गुन्हा दाखल करून तपास सुरू केला आहे.
