नवी दिल्ली : उत्तराखंडमधील अंकिता भंडारी हत्या प्रकरणात न्याय मिळावा, या मागणीसाठी दिल्लीतील इंडिया गेट परिसरात सुरू असलेले आंदोलन गुरुवारी पहाटे पोलिसांनी हटवले. या कारवाईदरम्यान अंकिताचे आई-वडील, काँग्रेसचे काही नेते आणि अन्य आंदोलकांना ताब्यात घेण्यात आले. नंतर सर्वांची सुटका करण्यात आली. मात्र, आंदोलन करणाऱ्यांशी पोलिसांनी अयोग्य वर्तन केल्याचा आरोप काँग्रेस नेत्यांनी केला आहे.
बुधवारी राहुल गांधी आणि प्रियंका गांधी वाड्रा यांनी आंदोलनस्थळी जाऊन अंकिताच्या पालकांची भेट घेतली होती. त्यानंतर काही तासांतच पोलिसांनी कारवाई केल्याने या घटनेची चर्चा सुरू झाली आहे. पहाटे सुमारे 4 वाजता ही कारवाई करण्यात आल्याचे वृत्त आहे. काँग्रेस नेते सुप्रिया श्रीनेत, उदय भानू चिब, विनोद जाखड आणि वरुण चौधरी यांनाही ताब्यात घेण्यात आले होते.
अंकिताच्या हत्येमागे एका कथित ‘व्हीआयपी’ व्यक्तीचा सहभाग असल्याचा संशय कुटुंबीयांनी व्यक्त केला आहे. या पैलूची सखोल चौकशी पूर्ण होईपर्यंत दुष्यंत कुमार गौतम यांची सिक्कीमच्या राज्यपालपदी झालेली नियुक्तीला निषेध करत आहेत.
अंकिता भंडारी ही ऋषिकेशजवळील वनंत्रा रिसॉर्टमध्ये रिसेप्शनिस्ट म्हणून काम करत होती. 19 वर्षीय अंकिताची 18 सप्टेंबर 2022 रोजी हत्या झाली होती. चार दिवसांनंतर तिचा मृतदेह चिल्ला कालव्यात सापडला. या प्रकरणात रिसॉर्टचा मालक पुलकित आर्य आणि कर्मचारी सौरभ भास्कर व अंकित गुप्ता यांना अटक करण्यात आली होती. 30 मे 2025 रोजी न्यायालयाने तिघांना हत्या, पुरावे नष्ट करणे आणि अन्य गुन्ह्यांमध्ये जन्मठेपेची शिक्षा सुनावली.
काँग्रेस नेते पवन खेरा, सुप्रिया श्रीनेत आणि काझी निजामुद्दीन यांनी पोलिसांच्या कारवाईवर टीका केली. न्यायाची मागणी करणाऱ्या कुटुंबीयांना ताब्यात घेण्याऐवजी त्यांच्या मागण्यांची दखल घ्यायला हवी होती, असे त्यांनी म्हटले. सीबीआयचा तपास पूर्ण होईपर्यंत संबंधित नियुक्ती स्थगित ठेवावी, अशी मागणी अंकिताचे वडील वीरेंद्र सिंह भंडारी यांनी राष्ट्रपती द्रौपदी मुर्मू यांच्याकडे केली आहे.
या प्रकरणातील कथित ‘व्हीआयपी’ संबंधांची चौकशी व्हावी आणि कुटुंबाला न्याय मिळावा, यासाठी आंदोलन सुरू ठेवणार असल्याचे काँग्रेसने सांगितले आहे.
