मुंबई : गेल्या काही दिवसांपासून सोन्याच्या किमतीत सातत्याने घसरण होत असून, याचा परिणाम सराफा बाजारावर दिसत आहे. जानेवारी महिन्यात सोन्याने विक्रमी उच्चांक गाठल्यानंतर त्याचा दर प्रति तोळा 2 लाख रुपयांपर्यंत पोहोचण्याचा अंदाज व्यक्त केला जात होता. मात्र, गेल्या काही महिन्यांतील बाजारातील बदलांमुळे सोन्याच्या किमतींनी वेगळेच वळण घेतले आहे. मागील 8 दिवसांत सोन्याचा भाव तब्बल 12,400 रुपयांनी कमी झाला आहे. 20 नोव्हेंबर रोजीही ही घसरण सुरूच आहे.

जागतिक बाजारातील घडामोडी आणि देशांतर्गत सराफा बाजारातील परिस्थिती यामुळे सोन्या-चांदीच्या दरांवर दबाव निर्माण झाला आहे. मजबूत होत असलेला भारतीय रुपया आणि अमेरिकेच्या फेडरल रिझर्व्हकडून व्याजदरांबाबत कठोर भूमिका घेतली जाण्याची शक्यता याचाही सोन्याच्या किमतीवर परिणाम होत आहे.
आज सोन्याचे दर किती?

19 नोव्हेंबर रोजी दिल्लीच्या बाजारात 24 कॅरेट सोन्याच्या दरात प्रति 10 ग्रॅममागे 1,300 रुपयांची घट झाली होती. त्यानंतर 20 नोव्हेंबरच्या सकाळीही दर कमी झाले. दिल्लीत सध्या 24 कॅरेट सोन्याचा भाव 10 ग्रॅमसाठी 1,30,830 रुपये, तर 22 कॅरेट सोन्याचा दर 1,19,940 रुपये आहे.
मुंबई, पुणे, कोलकाता, चेन्नई आणि बेंगळुरू या शहरांमध्ये 24 कॅरेट सोन्याचा भाव 1,30,680 रुपये, तर 22 कॅरेट सोन्याचा दर 1,19,790 रुपये प्रति 10 ग्रॅम नोंदवण्यात आला आहे.
चांदीच्या दरातही मोठी घसरण
सोन्याप्रमाणे चांदीच्या किमतीतही नरमाई आली आहे. 20 नोव्हेंबर रोजी चांदीचा भाव प्रति किलो 1,79,900 रुपयांवर पोहोचला आहे.







