हैदराबाद: माजी भारतीय क्रिकेटपटू अंबाती रायडू यांनी आंध्र प्रदेशच्या राजकारणात प्रवेश केला आहे. 37 वर्षीय रायडू जगन मोहन रेड्डी यांच्या पक्षात सामील झाला आहे. निवृत्तीनंतर रायडूने गुरुवारी (28 डिसेंबर) अधिकृतपणे वायएसआर पार्टीमध्ये प्रवेश केला आहे. युवाजन श्रमिका रिथू काँग्रेस पक्षाचे (वायएसआरसीपी) अध्यक्ष जगन मोहन रेड्डी यांच्या उपस्थितीत त्याने पक्षात प्रवेश केला. सर्व पक्ष आगामी लोकसभा निवडणुकीच्या तयारीत व्यस्त असताना रायडू याने पक्षात प्रवेश केला. अशा परिस्थितीत पक्ष त्याला लोकसभा निवडणुकीत तिकीट देणार का? असा प्रश्न उपस्थित केला जात आहे.
अंबाती रायडूने 29 मे रोजी इंडियन प्रीमियर लीगच्या अंतिम सामन्यात चेन्नई सुपर किंग्जकडून शेवटचा क्रिकेट सामना खेळला होता. राजकारणात येण्यापूर्वी त्यांनी आपल्या मूळ गुंटूर जिल्ह्यातील प्रत्येक कानाकोपऱ्याला भेट दिली आणि लोकांच्या समस्या समजून घेतल्या.
38 वर्षीय अंबाती रायडूने गेल्या जूनमध्ये राजकारणात प्रवेश करण्याचा मानस व्यक्त केला होता. मुत्तुरुच्या भेटीदरम्यान पत्रकारांशी बोलताना तो म्हणाला होता की, ‘लोकांची सेवा करण्यासाठी मी लवकरच आंध्र प्रदेशच्या राजकारणात प्रवेश करणार आहे. याआधी जिल्ह्यातील विविध भागात जाऊन जनतेची नाडी जाणून त्यांच्या समस्या समजून घेण्याचे मी ठरवले आहे. माजी क्रिकेटपटू 2024 ची लोकसभा निवडणूक आंध्र प्रदेशातील गुंटूर किंवा मछलीपट्टणम लोकसभा मतदारसंघातून लढवतील अशी अटकळ होती. मात्र, रायडूने हे दावे फेटाळून लावले.
रायडूने भारतासाठी 55 एकदिवसीय सामने खेळले आहेत. या काळात त्याने 47 पेक्षा जास्त सरासरीने 1694 धावा केल्या. रायुडूने वनडेमध्ये 3 शतके आणि 10 अर्धशतके केली आहेत. त्याने 3 विकेट्सही घेतल्या आहेत. त्याच वेळी रायडूने 6 टी-20 सामन्यांमध्ये भारताचे प्रतिनिधित्व केले आणि 10.50 च्या सरासरीने 42 धावा केल्या. याशिवाय रायडूने प्रथम श्रेणी क्रिकेटमध्ये ६१५१ धावा केल्या आहेत, तर लिस्ट ए मध्ये ५६०७ धावा केल्या आहेत.
