Crude Oil : नवी दिल्ली : भारतात लोकसंख्या प्रचंड असल्याने मोठ्या प्रमाणात कच्च्या तेलाची आयात देखील होते. रशियाकडून मोठ्या प्रमाणात स्वस्त दरात कच्च्या तेलाचा पुरवठा होतो. त्यातच भारताला आता आणखी एक देश मिळाला आहे जो स्वस्त दरात कच्च्या तेलाचा पुरवठा करणार आहे. रशियानंतर आता भारताला व्हेनेझुएलातून स्वस्त दरात कच्च्या तेलाचा पुरवठा होऊ शकतो.
जगातील सर्वात जास्त तेलाचा साठा
व्हेनेझुएलातून स्वस्त दरात कच्चे तेल मिळू शकते. अमेरिकेच्या धोरणांमधील ताज्या बदलामुळं याचा मार्ग खुला झाला आहे. त्यांच्या आर्थिक निर्बंधांमुळे व्हेनेझुएला आपले कच्चे तेल विकू शकली नाही. आत्तापर्यंत सापडलेल्या तेलाच्या साठ्यानुसार व्हेनेझुएलामध्ये जगातील सर्वात जास्त तेलाचा साठा आहे. त्यामुळ ही कच्च्या तेलाच्या वाढत्या किमतींदरम्यान भारतासाठी एक आनंदाची बातमी आली आहे.
अमेरिकेने निर्बंध कमी केले
व्हेनेझुएला अशा देशांपैकी एक आहे जिथे चलनवाढ सध्या जगात सर्वाधिक आहे. ढासळत्या अर्थव्यवस्थेमुळं देश दीर्घकाळ राजकीय अस्थिरतेच्या काळात गेला आहे. व्हेनेझुएलाच्या आर्थिक संकटासाठी अमेरिकेने लादलेले निर्बंध कारणीभूत होते. ज्यामुळं व्हेनेझुएला आपले कच्चे तेल विकू शकले नाही. आता अमेरिकेने आपली धोरणे बदलली आहेत, त्यामुळं व्हेनेझुएलासाठी आंतरराष्ट्रीय बाजारपेठेत पुन्हा प्रवेश करण्याचा मार्ग खुला आहे. दोन आठवड्यांपूर्वी भारताने व्हेनेझुएलाकडून कच्चे तेल खरेदी करण्यास हरकत नसल्याचे स्पष्ट संकेत दिले होते. भारताला 80 टक्क्यांहून अधिक कच्चे तेल इतर देशांकडून खरेदी करावे लागते. याच कारणामुळे भारत हा जगातील तिसरा सर्वात मोठा कच्च्या तेलाचा आयातदार आहे. रशियाच्या तुलनेत व्हेनेझुएला 10 टक्के अतिरिक्त सवलत देऊ शकते असे सांगितले जात आहे.
