जुनागढ: गुजरातमधील जुनागढ (Crime News) शहरातून एक धक्कादायक प्रकरण समोर आले आहे. एका महिलेनं निवृत्त वन अधिकाऱ्याला प्रेम आणि विश्वासाच्या जाळ्यात अडकवून तब्बल 40 लाख रुपये उकळण्याचा प्रयत्न केला. या प्रकरणी निवृत्त अधिकाऱ्याने पोलिसांत तक्रार दाखल केली असून तपासादरम्यान तिघांना ताब्यात घेण्यात आले आहे. सध्या पोलिस तपास सुरू आहे.
मिळालेल्या माहितीनुसार, जुनागढमधील चोबारी रोडवर राहणारे हे अधिकारी 2017 साली सेवेतून निवृत्त झाले होते. काही महिन्यांपूर्वी त्यांना फेसबुकवर उर्मिला नावाच्या महिलेची रिक्वेस्ट आली. तिने स्वत:ला अविवाहित असल्याचे सांगितले. दोघांमध्ये बोलणे सुरू झाले आणि त्यातून जवळीक वाढली. काही दिवसांनंतर ते एका हॉटेलमध्ये भेटले. यावेळी उर्मिलाने हॉटेलमधील त्यांच्या खासगी क्षणांचे गुपचूप चित्रीकरण केले.
यानंतर काही दिवसांनी उर्मिलाने अधिकाऱ्याला फोन करून ती गर्भवती असल्याचे सांगितले. गर्भपातासाठी पैशांची गरज असल्याचे सांगत ती वारंवार पैशांची मागणी करू लागली. अधिकाऱ्यांनी तिला अनेकवेळा पैसे पाठवले. 19 सप्टेंबर 2025 रोजी उर्मिलाने त्यांना पुन्हा चोटिला येथील एका हॉटेलमध्ये बोलावले आणि त्यावेळीही व्हिडिओ शूट केला.
यानंतर निवृत्त अधिकाऱ्याला एका अनोळखी व्यक्तीचा फोन आला. त्याने अधिकाऱ्याला खासगी व्हिडिओ असल्याचे सांगून 40 लाख रुपयांची मागणी केली. त्याचवेळी महिला गर्भपाताच्या नावाखाली सातत्याने पैसे मागत राहिली. त्यामुळे अधिकाऱ्यांना संशय आला आणि त्यांनी थेट पोलिसांकडे धाव घेतली. तक्रारीनंतर पोलिस तपासात समोर आले की, उर्मिलाने निवृत्त अधिकाऱ्यासोबतचे खासगी क्षण रेकॉर्ड करून ते मित्राला पाठवले होते. या व्हिडिओच्या आधारावर तीन जण मिळून अधिकाऱ्याला ब्लॅकमेल करत होते. पोलिसांनी तिघांना ताब्यात घेतले असून पुढील चौकशी सुरू आहे.
