हैदराबाद: राजस्धान, मध्य प्रदेश, छत्तीसगड, तेलंगणा या राज्यांमध्ये आज मतमोजणी सुरु असून मिझोरममध्ये सोमवारी मतमोजणी होणार आहे. तेलंगणामध्ये काँग्रेसला स्पष्ट बहुमत मिळत असल्याचा अंदाज एग्झिट पोल्सच्या माध्यमातून वर्तवण्यात आला होता. मतमोजणीच्या पहिल्या काही तासांमध्ये हा कौल अधिकाधिक स्पष्ट होऊ लागताच तेलंगणामधील राजकीय हालचालीला वेग आला आहे.
तेलंगणामध्ये काँग्रेसला बहुमत मिळत असल्याचे प्रारंभिक कौल येताच काँग्रेस पक्ष सतर्क झाला आहे. हैदराबादमध्ये काही लग्झरी बसेस तयार ठेवण्यात आल्या आहेत. सर्व विजयी आमदारांना लगेच हॉटेलमध्ये शिफ्ट करण्यात येणार असल्याचं सांगितलं जात आहे. या दरम्यान काँग्रेसचे नेते स्पष्ट बहुमत असल्यामुळे आम्हाला चिंता वाटण्याचं कारण नाही, अशी भूमिका मांडत आहेत. पण, तरीही कोणताही धोका पत्करण्यासाठी काँग्रेस नेतेमंडळी तयार नसल्याचं त्यांच्या प्रतिक्रियांवरून दिसून येत आहे.
“केसीआर यांची पद्धत सगळ्यांनाच माहिती ”
कोणत्याही पक्षाच्या आमदारांना गळाला लावण्याची केसीआर यांची पद्धत असल्याचा दावा काँग्रेसकडून करण्यात आला आहे. “आपल्या सर्वांना केसीआर यांची कामाची पद्धत माहिती आहे. आमदारांना पळवणे त्यांची पद्धत आहे. त्यानुसार आम्ही काही सतर्कतेचे उपाय करून ठेवले आहेत. परंतु, निकालाचे कौल पाहाता आम्हाला काळजी करण्याची गरज वाटत नाही, असं दिसतंय. कारण आम्ही किमान ८० जागांवर विजयी मिळवत आहोत, अशी प्रतिक्रिया तेलंगणा काँग्रेस प्रदेश उपाध्यक्ष किरण कुमार यांनी दिली आहे. दरम्यान, हैदराबादमधील ताज कृष्णा परिसरात बसेस तयार ठेवण्यात आल्या आहेत. सर्व विजयी आमदारांना बंगळुरूमध्ये शिफ्ट करण्यात येणार असल्याचं सांगितलं जात आहे.
