बिहार : बिहारमधील वैशाली जिल्ह्यात गंगा नदीत नाव उलटल्याने मोठी दुर्घटना घडली. या अपघातात 13 मुलांचा बुडून मृत्यू झाला असून, काही जण बेपत्ता असल्याची माहिती समोर आली आहे. मंगळवारी रात्री घडलेल्या या घटनेमुळे परिसरात शोककळा पसरली आहे. बेपत्ता व्यक्तींचा शोध घेण्यासाठी बचाव पथकांकडून शोधमोहीम राबवण्यात आली.
वैशाली जिल्ह्यातील राघोपुर परिसरातील रामपुर श्यामचंद पंचायत येथील भगतान टोला भागात श्राद्धाचा कार्यक्रम आयोजित करण्यात आला होता. या कार्यक्रमाला जाण्यासाठी सुमारे 20 ते 25 जण एका छोट्या नावेतून नदीपलीकडे निघाले होते. प्रवासादरम्यान नदीच्या प्रवाहात नाव अचानक उलटली आणि त्यातील प्रवासी पाण्यात पडले.
घटनेची माहिती मिळताच स्थानिक नागरिकांनी मदतीसाठी धाव घेतली. ग्रामस्थांनी अनेकांना पाण्याबाहेर काढून रुग्णालयात दाखल केले. राघोपुर फतेहपूर येथील प्राथमिक आरोग्य केंद्रात आणलेल्या मुलांपैकी 13 जणांना डॉक्टरांनी मृत घोषित केले. तीन मुलांची प्रकृती गंभीर असल्याने त्यांना पाटणा येथील पीएमसीएच रुग्णालयात पाठवण्यात आले, तर एका मुलाची प्रकृती स्थिर असल्याचे सांगण्यात आले.
पंतप्रधान नरेंद्र मोदी यांनी या दुर्घटनेबद्दल दुःख व्यक्त करत मृतांच्या कुटुंबीयांना प्रधानमंत्री राष्ट्रीय मदत निधीतून प्रत्येकी 2 लाख रुपये, तर जखमींना 50,500 रुपयांची मदत जाहीर केल्याची माहिती आहे. बिहार सरकारनेही मृतांच्या वारसांना प्रत्येकी 4 लाख रुपये देण्याची घोषणा केली आहे.
दरम्यान, नाव जीर्ण अवस्थेत होती आणि रात्रीच्या प्रवासासाठी आवश्यक सुरक्षा व्यवस्था नव्हती, असा आरोप स्थानिक ग्रामस्थांनी केला आहे. या आरोपांची अधिकृत पुष्टी झालेली नसून, दुर्घटनेच्या कारणांचा तपास सुरू आहे.
