नवी दिल्ली : आगामी लोकसभा आणि उत्तर प्रदेशसह विविध राज्यांच्या विधानसभा निवडणुकांच्या पार्श्वभूमीवर भारतीय जनता पक्षाने आपली नवी राष्ट्रीय टीम जाहीर केली आहे. पक्षाचे राष्ट्रीय अध्यक्ष नितीन नवीन यांनी जाहीर केलेल्या या नव्या कार्यकारिणीत प्रादेशिक समतोल, युवा आणि महिला नेतृत्वाला प्राधान्य देण्यात आले आहे. महाराष्ट्रातील काही प्रमुख नेत्यांनाही महत्त्वाच्या जबाबदाऱ्या देण्यात आल्या आहेत.
विनोद तावडेंकडे राष्ट्रीय सरचिटणीसपद कायम
भाजपचे खासदार विनोद तावडे यांच्याकडे राष्ट्रीय महामंत्री म्हणजेच सरचिटणीसपदाची जबाबदारी कायम ठेवण्यात आली आहे. आगामी विधानसभा निवडणुकांच्या पार्श्वभूमीवर संघटनात्मक पातळीवर तावडेंची भूमिका महत्त्वाची ठरणार आहे.
महाराष्ट्रातून भारती पवार, पीयूष गोयल यांनाही जबाबदारी
नव्या राष्ट्रीय कार्यकारिणीत महाराष्ट्रातील इतर नेत्यांनाही स्थान देण्यात आले आहे.
डॉ. भारती प्रवीण पवार यांची राष्ट्रीय उपाध्यक्षपदी नियुक्ती करण्यात आली आहे. तर केंद्रीय मंत्री पीयूष गोयल यांच्याकडे राष्ट्रीय कोषाध्यक्षपदाची जबाबदारी सोपवण्यात आली आहे. प्रीती गांधी यांची सोशल मीडिया सह-संयोजकपदी निवड करण्यात आली आहे.
स्मृती इराणींचे पक्ष संघटनेत पुनरागमन
लोकसभा निवडणुकीनंतर राजकारणात काहीशा बाजूला पडलेल्या माजी केंद्रीय मंत्री स्मृती इराणी यांना भाजपच्या नव्या संघटनेत महत्त्वाची जबाबदारी देण्यात आली आहे. त्यांची राष्ट्रीय महामंत्रीपदी निवड करण्यात आली आहे.
वसुंधरा राजेंनाही राष्ट्रीय कार्यकारिणीत स्थान
राजस्थानच्या माजी मुख्यमंत्री वसुंधरा राजे सिंधिया यांची राष्ट्रीय उपाध्यक्षपदी नियुक्ती करण्यात आली आहे. राजस्थानमधील पक्षाच्या संघटनात्मक कामकाजात त्यांची भूमिका महत्त्वाची राहणार आहे.
बी. एल. संतोष यांच्याकडे संघटन महामंत्रीपद कायम
बी. एल. संतोष यांच्याकडे राष्ट्रीय महामंत्री (संघटन) पदाची जबाबदारी कायम ठेवण्यात आली आहे. राजेश मंगल यांची राष्ट्रीय सह-कोषाध्यक्षपदी नियुक्ती करण्यात आली आहे.
भाजपच्या नव्या टीममध्ये १३ उपाध्यक्ष, ८ महामंत्री आणि १६ राष्ट्रीय मंत्री
भाजपच्या नव्या राष्ट्रीय कार्यकारिणीत १३ राष्ट्रीय उपाध्यक्ष, ८ राष्ट्रीय महामंत्री आणि १६ राष्ट्रीय मंत्र्यांचा समावेश आहे. उत्तर प्रदेशातील आगामी विधानसभा निवडणुका लक्षात घेता या राज्यातील अनेक नेत्यांना नव्या टीममध्ये स्थान देण्यात आले आहे.
सोशल मीडिया संघटनेतही बदल
भाजपच्या सोशल मीडिया विभागातही महत्त्वाचा बदल करण्यात आला आहे. सोशल मीडिया संयोजक अमित मालवीय यांना या जबाबदारीतून हटवण्यात आल्याची माहिती असून, त्यांच्या जागी दीपक मस्के यांची नियुक्ती करण्यात आली आहे.
आगामी विधानसभा निवडणुकांच्या पार्श्वभूमीवर भाजपने राष्ट्रीय पातळीवर केलेल्या या नियुक्त्यांमधून संघटन मजबूत करण्यासोबतच विविध राज्यांमधील राजकीय आणि सामाजिक समीकरणांचा विचार करण्यात आल्याचे दिसून येत आहे.
