अयोध्या : अयोध्येतील भव्य राम मंदिराच्या प्राणप्रतिष्ठा सोहळ्यासाठी अवघे काही तास उरले आहेत. उद्या रामलल्लाचा प्राणप्रतिष्ठा सोहळा पार पडणार असून, सर्वत्र याचा उत्साह पाहायला मिळत आहे. पंतप्रधान नरेंद्र मोदी यांच्यासह सुमारे ८ हजार पाहुणे या कार्यक्रमाला उपस्थित राहणार आहेत. प्राणप्रतिष्ठा सोहळ्यादिवशी पंतप्रधान मोदींचा दौरा कसा असेल याचे वेळापत्रक समोर आले आहे.
पंतप्रधान नरेंद्र मोदी सोमवारी (ता. २२) सकाळी १०.२५ वाजता अयोध्येत दाखल होतील. यावेळी विमानतळावर त्यांच्या स्वागतासाठी उत्तर प्रदेशचे मुख्यमंत्री योगी आदित्यनाथ यांच्यासह अनेक प्रशासकीय अधिकारी आणि मान्यवर उपस्थित असतील. येथून ते १०.५५ वाजण्याच्या सुमारास राम मंदिरात दाखल होतील. ११ ते १२ वाजण्याच्या दरम्यानचा वेळ राखीव ठेवण्यात आला आहे. त्यानंतर पंतप्रधान मोदी १२.५ वाजता अयोध्येतील राम मंदिरात अभिषेक, प्राणप्रतिष्ठा आणि पूजा करतील. यानंतर दुपारी १ वाजता पंतप्रधान इतर कार्यक्रमांमध्ये सहभागी होतील.
राम मंदिरातील पूजेनंतर पंतप्रधान मोदी भगवान शंकराचे दर्शन घेतील. पंतप्रधान मोदी यांच्या हस्ते दुपारी १२ वाजण्याच्या सुमारास प्राणप्रतिष्ठा सोहळ्याला सुरुवात होईल. रामललाची प्राणप्रतिष्ठा १२.५५ वाजेपर्यंत सुरु राहील. त्यानंतर पंतप्रधान सार्वजनिक कार्यक्रमांमध्ये हजेरी लावतील. अयोध्येमध्ये विविध कार्यक्रमांमध्ये सहभागी झाल्यानंतर पंतप्रधान मोदी दुपारी २.१५ वाजण्याच्या सुमारास कुबेर टेकडीवरील शिव मंदिरात पूजा करतील आणि दर्शन घेतील.
राम मंदिर ट्रस्टच्या अधिकाऱ्यांनी दिलेल्या माहितीनुसार, २२ जानेवारीपर्यंत विधी सुरू राहणार असून रामललाच्या मूर्तीच्या प्राणप्रतिष्ठेसाठी आवश्यक असलेले प्रत्येक विधी केले जातील. १२१ आचार्य हे विधी करत आहेत. यापूर्वी १७ जानेवारी रोजी राम मंदिराच्या गर्भगृहात रामलल्लाची मूर्ती आणण्यात आली होती. मूर्ती आत आणण्यापूर्वी गर्भगृहात विशेष पूजा करण्यात आली. यानंतर १८ जानेवारी रोजी गाभाऱ्यात मूर्तीची प्रतिष्ठापना करण्यात आली.
राम मंदिर ट्रस्टच्या अधिकाऱ्यांनी दिलेल्या माहितीनुसार, २१ जानेवारीपर्यंत विधी सुरू राहणार असून, रामललाच्या मूर्तीच्या प्राणप्रतिष्ठेसाठी आवश्यक असलेले प्रत्येक विधी केले जातील. १२१ आचार्य विधी करीत आहेत. पंतप्रधान मोदींच्या हस्ते प्राणप्रतिष्ठा विधी पूर्ण होईल. रामललाच्या प्राणप्रतिष्ठेसाठी पंतप्रधान मोदी ११ दिवसांचं खास अनुष्ठान करत आहेत.
