पुणे: मुंबईच्या जोगेश्वरी पूर्व भागातील एका बांधकाम (Worker Death) साईटवर झालेल्या अपघातामुळे कामगारांच्या सुरक्षेचा आणि बालकामगार कायद्याचा प्रश्न पुन्हा एकदा ऐरणीवर आला आहे. ‘देवभूमी कन्स्ट्रक्शन’ साईटवर तिसऱ्या मजल्यावरून खाली कोसळल्याने 3 कामगारांना गंभीर दुखापत झाली, यात एका 17 वर्षीय तरुणाचा दुर्देवी मृत्यू झाला आहे.
अपघात आणि बालकामगारांचा मुद्दा
मिळालेल्या माहितीनुसार, मध्यरात्री 12 वाजण्याच्या सुमारास सोसायटी रोड परिसरात ही घटना घडली. जखमी झालेल्यांपैकी दोन कामगारांचे वय अनुक्रमे 17 आणि 18 वर्षे असल्याचे समोर आले आहे. धोकादायक ठिकाणी कमी वयाच्या मुलांना कामावर ठेवण्यात आल्याचा गंभीर आरोप स्थानिक नागरिकांनी आणि कामगार संघटनांनी केला आहे.
पोलिसांनी वर्तवलेल्या अंदाजानुसार, बांधकाम साईटवर कामगारांसाठी आवश्यक असलेले सुरक्षा साहित्य (उदा. हार्नेस, नेट) वापरले गेले नव्हते. कामगारांच्या सुरक्षेची जबाबदारी असलेले विकासक आणि कंत्राटदार यांच्या निष्काळजीपणामुळे एका तरुणाला जीव गमवावा लागला. त्यामुळे परिसरात संतापाचे वातावरण आहे. जोगेश्वरी पोलिस या घटनेची अधिक चौकशी करत आहेत.
