वसई : मुंबईच्या उपनगरातील वसई परिसरात एक हृदयद्रावक घटना घडली आहे. दुचाकीवरून प्रवास करताना आईच्या हातातून एक वर्षांची मुलगी रस्त्यावर पडली. या अपघातात गंभीर जखमी झालेल्या चिमुकलीचा मुंबईतील KEM रुग्णालयात उपचारादरम्यान मृत्यू झाला. कृषा असे मृत मुलीचे नाव आहे.
मिळालेल्या माहितीनुसार, नायगाव पूर्व परिसरातील पवित्रधाम सोसायटीत राहणारे योगेश भावसार (वय 35) हे शुक्रवारी दुपारी पत्नी आणि मुलगी कृषासोबत स्कूटीवरून तिवारी रोडने जात होते. योगेश वाहन चालवत होते, तर त्यांची पत्नी मागे बसून मुलीला हातात घेऊन प्रवास करत होती.
प्रवासादरम्यान अचानक जोरदार वारा सुटल्याने महिलेचे केस चेहऱ्यावर येऊ लागले. त्यामुळे मुलीला एका हाताने धरून दुसऱ्या हाताने केस बांधण्याचा प्रयत्न तिने केला. याच वेळी धावत्या स्कूटीवरून कृषा थेट रस्त्यावर पडली.
मुलगी खाली पडल्याचे लक्षात येताच पालकांनी तातडीने स्कूटी थांबवली. अपघातात कृषाच्या डोक्याला गंभीर दुखापत झाली होती. त्यामुळे तिला विलंब न करता उपचारासाठी मुंबईतील KEM रुग्णालयात दाखल करण्यात आले.
डॉक्टरांकडून उपचार सुरू करण्यात आले. मात्र, प्रकृती गंभीर असल्याने तिची झुंज अपयशी ठरली. शुक्रवारी रात्री उपचारादरम्यान कृषाचा मृत्यू झाला. या घटनेमुळे भावसार कुटुंबावर दुःखाचा डोंगर कोसळला आहे. अवघ्या एक वर्षांच्या मुलीचा अशा प्रकारे मृत्यू झाल्याने परिसरात हळहळ व्यक्त होत आहे.
