सोलापूर: मराठा आरक्षण आणि जात प्रमाणपत्राच्या मुद्द्यावरून मराठा आरक्षण आंदोलनाचे नेते मनोज जरांगे पाटील यांनी राज्य सरकारविरोधातील आक्रमक भूमिका कायम ठेवली आहे. सध्या सोलापूर दौऱ्यावर असलेल्या जरांगे पाटील यांनी पंढरपूर तालुक्यातील सरकोली येथे झालेल्या सभेत महसूल मंत्री आणि भाजप नेते चंद्रशेखर बावनकुळे यांच्यावर जोरदार टीका केली.
यावेळी जरांगे पाटील यांनी बावनकुळे यांच्या नावावरूनही खोचक टिप्पणी केली. “बावनकुळे हे नाव कधी ऐकलंच नाही, मुळव्याध ऐकलं आहे. आमचं कुळ तर ९६ कुळ आहे, हे बावनकुळ कुठून काढलं,” असे ते म्हणाले.
पुढे त्यांनी बावनकुळे यांच्या दिसण्यावरही टीका केली. “बावनकुळे प्राणी असा विचित्र दिसतो. पूर्वीच्या हडप्पा संस्कृतीमधील मोहेंजोदडोप्रमाणे आणि अजंठातील लेणीप्रमाणे हा माणूस दिसतो,” असे वक्तव्य जरांगे पाटील यांनी केले. त्यांच्या या वक्तव्याची राजकीय वर्तुळात चर्चा सुरू झाली आहे.
यावेळी जरांगे पाटील यांनी मराठा समाज आणि कुणबी प्रमाणपत्राच्या मुद्द्यावरही आपली भूमिका स्पष्ट केली. “तुम्हाला तुमचा नेता प्रिय असेल, पण आमची जात, आमचा बाप आणि समाज हाच पक्ष आहे. आम्हाला दुसरे कोणी मोठे नाही,” असे ते म्हणाले.
गेल्या वर्षभरात मुंबईतील आंदोलनापासून आपण देवेंद्र फडणवीस यांच्यावर बोललो नाही. मात्र, बावनकुळे यांनी मराठा समाजाची कुणबी प्रमाणपत्रे रद्द करण्याची भूमिका घेतली तर आपण त्यांच्यावर बोलणार असल्याचेही जरांगे पाटील यांनी सांगितले.
कुणबी प्रमाणपत्रे आणि जात पडताळणीच्या मुद्द्यावरून यापूर्वीही जरांगे पाटील यांनी बावनकुळे यांच्यावर गंभीर आरोप केले आहेत. कुणबी प्रमाणपत्रे रद्द करण्यास सांगितल्याचा आरोप करत त्यांनी बावनकुळे यांची नार्को टेस्ट करण्याची मागणी केली होती.
दरम्यान, जरांगे पाटील यांच्या आरोपांना चंद्रशेखर बावनकुळे यांनी उत्तर देताना आरोपांमध्ये कोणतेही तथ्य नसल्याचे स्पष्ट केले होते. तसेच आपण नार्को चाचणीसाठीही तयार असल्याचे त्यांनी म्हटले होते. त्यामुळे मराठा आरक्षण आणि कुणबी प्रमाणपत्राच्या मुद्द्यावरून दोन्ही बाजूंमधील आरोप-प्रत्यारोप पुन्हा तीव्र झाले आहेत.
