पिंपरी: पुण्यातील भोसरी परिसरात सोन्याचा झुमका चोरी केल्याचा आरोप करून एका तरुणाकडे पैशांची मागणी करण्यात आल्याने त्याने टोकाचे पाऊल उचलल्याची घटना समोर आली आहे. या प्रकरणी भोसरी पोलिसांनी एका महिलेविरोधात गुन्हा दाखल केला असून, पुढील तपास सुरू आहे.
विनोद पेमाराम चौधरी (वय २६) असे मृत तरुणाचे नाव आहे. याप्रकरणी त्याचे वडील पेमाराम लसाराम चौधरी (वय ५८, रा. भोसरी, मूळगाव देसुरी, पाली, राजस्थान) यांनी भोसरी पोलीस ठाण्यात तक्रार दाखल केली आहे.
पोलिसांनी दिलेल्या माहितीनुसार, संबंधित महिलेचा सोन्याचा झुमका विनोदच्या दुकानात पडल्याचा तिला संशय होता. यावरून तिने विनोदकडे ८५ हजार रुपयांची मागणी केल्याचा आरोप आहे. पैसे न दिल्यास पोलिसांत तक्रार करण्याची धमकीही दिल्याचे तक्रारीत नमूद करण्यात आले आहे.
त्यानंतर विनोदकडून एक लाख रुपये घेण्यात आले. मात्र, त्यानंतरही संबंधित महिलेने आणखी एका व्यक्तीला सोबत आणून विनोदकडे पुन्हा ५५ हजार रुपयांची मागणी केल्याचा आरोप आहे. या प्रकारामुळे विनोदवर मानसिक दबाव निर्माण झाल्याचे कुटुंबीयांनी तक्रारीत म्हटले आहे.
दरम्यान, २७ जुलै रोजी विनोदचा मृत्यू झाला. या घटनेनंतर त्याच्या वडिलांनी भोसरी पोलिसांकडे तक्रार दाखल केली. तक्रारीच्या आधारे पोलिसांनी संबंधित महिलेविरोधात गुन्हा नोंदवला आहे.
सोन्याचा झुमका चोरीचा आरोप, पैशांची मागणी आणि त्यानंतरचा मानसिक त्रास यामुळेच विनोदने हे टोकाचे पाऊल उचलले का, याचा तपास पोलीस करत आहेत. या प्रकरणातील आर्थिक व्यवहार आणि संबंधित व्यक्तींच्या भूमिकेचीही चौकशी सुरू आहे.
