पुणे: बँकिंग क्षेत्रात सरकारी नोकरीच्या शोधात असलेल्या तरुणांसाठी स्टेट बँक ऑफ इंडियाने (SBI) मोठी संधी उपलब्ध करून दिली आहे. SBI कडून ज्युनिअर असोसिएट म्हणजेच लिपिक पदाच्या 1,538 जागांसाठी भरती प्रक्रिया जाहीर करण्यात आली आहे. या भरतीसाठी इच्छुक उमेदवारांना 27 ऑगस्ट 2026 पर्यंत ऑनलाइन अर्ज करता येणार आहे.
या भरतीसाठी ऑनलाइन अर्ज प्रक्रिया 7 ऑगस्ट 2026 पासून सुरू झाली आहे. त्यामुळे पात्र उमेदवारांनी अंतिम मुदतीची वाट न पाहता आवश्यक कागदपत्रांसह अर्ज करण्याचे आवाहन करण्यात आले आहे.
शैक्षणिक पात्रतेचा विचार केल्यास, उमेदवाराकडे कोणत्याही मान्यताप्राप्त विद्यापीठाची पदवी असणे आवश्यक आहे. 31 डिसेंबर 2026 पर्यंत पदवी पूर्ण करणारे उमेदवारही या भरतीसाठी पात्र असतील. अंतिम वर्ष किंवा अंतिम सत्रात शिकणाऱ्या विद्यार्थ्यांनाही अर्ज करता येणार आहे. मात्र, निश्चित मुदतीपर्यंत पदवी उत्तीर्ण झाल्याचा पुरावा सादर करावा लागेल.
उमेदवाराचे वय किमान 21 आणि कमाल 28 वर्षे असणे आवश्यक आहे. आरक्षित प्रवर्गातील उमेदवारांना नियमानुसार वयोमर्यादेत सवलत मिळेल. OBC उमेदवारांना तीन वर्षे, तर SC आणि ST उमेदवारांना पाच वर्षांची सूट मिळणार आहे. दिव्यांग उमेदवारांसाठीही नियमानुसार अतिरिक्त वयोमर्यादा सवलत लागू असेल.
अर्ज शुल्क सर्वसाधारण आणि OBC प्रवर्गासाठी 750 रुपये आहे. SC, ST, PwBD, माजी सैनिक आणि DXS प्रवर्गातील उमेदवारांना अर्ज शुल्कातून सूट देण्यात आली आहे.
निवड झालेल्या उमेदवारांना 24,050 रुपयांपासून 64,480 रुपयांपर्यंत वेतनश्रेणी मिळणार आहे. निवड प्रक्रियेत प्रथम पूर्व परीक्षा, त्यानंतर मुख्य परीक्षा आणि संबंधित राज्याच्या स्थानिक भाषेची चाचणी अशा टप्प्यांचा समावेश आहे.
अर्ज करण्यासाठी उमेदवारांनी SBI च्या अधिकृत भरती संकेतस्थळावर जाऊन नोंदणी करावी. त्यानंतर अर्जामध्ये आवश्यक माहिती भरून फोटो, स्वाक्षरी आणि कागदपत्रे अपलोड करावीत. शुल्क भरल्यानंतर अर्ज अंतिमरित्या सबमिट करता येईल.
