पुणे: गणेशोत्सव आणि इतर सार्वजनिक उत्सवांमध्ये मोठ्या आवाजाच्या ध्वनिक्षेपकांचा होणारा वापर टाळण्यासाठी पुणे पोलिसांनी महत्त्वाची भूमिका घेतली आहे. उच्च क्षमतेच्या साउंड सिस्टिममुळे नागरिकांना होणारा त्रास लक्षात घेऊन ‘प्रेशर मीड’ आणि ‘प्लाझ्मा साउंड’सारख्या उपकरणांवर बंदी घालण्यात आली आहे. तसेच प्रखर लेझर झोतांचाही वापर टाळण्याचे आवाहन करण्यात आले आहे.
पुणे पोलीस आणि विघ्नहर्ता न्यासाच्या वतीने शिवाजीनगर पोलीस मुख्यालयात एका कार्यक्रमाचे आयोजन करण्यात आले होते. या कार्यक्रमात पोलीस आयुक्त अमितेश कुमार यांनी गणेशोत्सव शांततेत आणि नियमांचे पालन करून साजरा करण्याचे आवाहन केले.
गणेशोत्सवाच्या पार्श्वभूमीवर नुकतीच सर्वपक्षीय नेत्यांची बैठक झाली. शहरातील विविध उत्सवांमध्ये मोठ्या क्षमतेच्या ध्वनिक्षेपकांचा वापर वाढला असून, त्याचा परिणाम सामान्य नागरिकांवर होत असल्याचे पोलीस आयुक्तांनी सांगितले. नागरिकांसह सर्वपक्षीय नेत्यांनाही उत्सव साजरा करण्याच्या पद्धतीत सकारात्मक बदल अपेक्षित असल्याचे त्यांनी नमूद केले.
न्यायालयाने दिलेल्या आदेशांचे पालन करणे ही प्रत्येकाची जबाबदारी आहे. पुणेकर शिस्तप्रिय असून नियमांचे पालन करण्यासाठी ओळखले जातात. त्यामुळे दहीहंडी आणि गणेशोत्सवात मोठ्या आवाजाच्या ध्वनिक्षेपकांचा वापर न करता पारंपरिक पद्धतीने उत्सव साजरा करावा, असे आवाहन अमितेश कुमार यांनी केले.
सर्व घटकांना सोबत घेऊन यंदाचा गणेशोत्सव अधिक शिस्तबद्ध आणि आदर्श पद्धतीने साजरा करण्याचा प्रयत्न करूया. त्यातून इतर शहरांसमोर एक चांगला आदर्श निर्माण होईल आणि ‘पुणे पॅटर्न’ देशभर चर्चेचा विषय ठरेल, असा विश्वासही त्यांनी व्यक्त केला.
