शिरूर : कायद्याचे रक्षण करणाऱ्या पोलिस ठाण्याच्या प्रवेशद्वारातच दोन गटांनी एकमेकांवर तुफान हल्ला चढविल्याची धक्कादायक घटना आज शुक्रवारी (दि.30) दुपारी शिरूर येथील पोलिस ठाण्याच्या प्रवेशद्वाराजवळच घडली. प्रेमविवाहाच्या कारणावरून निर्माण झालेल्या वादाचे पर्यावसान थेट पोलिस ठाण्याच्या आवारातील राड्यात झाले. दोन्ही बाजूंच्या महिला आणि पुरुषांनी एकमेकांवर लाथाबुक्क्यांचा वर्षाव, दगडफेक आणि चप्पलफेक करीत तब्बल 20 मिनिटांहून अधिक काळ धुडगूस घातला. विशेष म्हणजे, पोलिसांसमोरच दोन्ही गट एकमेकांच्या अंगावर धावून जात असल्याने काही काळ परिस्थिती नियंत्रणाबाहेर गेली होती. या घटनेमुळे पोलिस ठाण्याच्या परिसरात एकच खळबळ उडाली होती.
या प्रकरणी मिळालेल्या माहितीनुसार, शिरूर तालुक्यातील मलठण परिसरातील शिंदेवाडी येथील एका तरुण-तरुणीने काही दिवसांपूर्वी स्वेच्छेने विवाह केला होता. मात्र, हा विवाह दोन्ही कुटुंबीयांना मान्य नसल्याने त्यांच्यातून वादाची ठिणगी पडली होती. गेल्या काही दिवसांपासून दोन्ही बाजूने सतत कुरबुरी सुरू होत्या. अखेर हा कौटुंबिक वाद शुक्रवारी (ता.30) थेट शिरूर पोलिस ठाण्यापर्यंत पोहोचला. दुपारी दोन्ही बाजूंचे 25 ते 30 जणांहून अधिक नातेवाईक पोलिस ठाण्यात दाखल झाले होते.
पोलिसांनी परिस्थितीचे गांभीर्य लक्षात घेऊन दोन्ही बाजूंच्या लोकांना बाहेर थांबवून संबंधित तरुण-तरुणींचे जबाब नोंदविण्याची प्रक्रिया सुरू केली होती. दरम्यान, दुपारी तीनच्या सुमारास पोलिस ठाण्याबाहेर थांबलेल्या दोन्ही गटांतील काही जणांमध्ये पुन्हा शाब्दिक चकमक सुरू झाली. सुरुवातीला बाचाबाची आणि शिवीगाळीने सुरू झालेला वाद काही क्षणांतच हाणामारीत रूपांतरित झाला. एकमेकांच्या अंगावर धावून जात दोन्ही बाजूंच्या लोकांनी मारहाण सुरू केली.
पोलिस आणि गृहरक्षक दलाच्या जवानांनी तातडीने हस्तक्षेप करून दोन्ही गटांना शांत करण्याचा प्रयत्न केला. मात्र, पोलिस ठाण्याच्या प्रवेशद्वाराजवळ आल्यानंतरही दोन्ही बाजूंचा संताप कमी झाला नाही. पुन्हा एकदा दोन्ही गट एकमेकांवर तुटून पडले. तरुणांनी एकमेकांच्या दिशेने दगड भिरकावले, तर महिलांनी एकमेकींना शिवीगाळ करीत चपला फेकून मारल्या. या अचानक झालेल्या राड्यामुळे परिसरात बघ्यांची मोठी गर्दी जमली. काही काळ तणावाचे वातावरण निर्माण झाले. या हाणामारीत दोन तरुणांसह एका महिलेला गंभीर दुखापत झाली. घटनेचे गांभीर्य लक्षात घेऊन पोलिसांनी अतिरिक्त कुमक मागवली. त्यानंतर पोलिसांनी दोन्ही गटांतील 25 ते 30 जणांना ताब्यात घेतले. रात्री उशिरापर्यंत संबंधितांवर गुन्हे दाखल करण्याची प्रक्रिया सुरू होती.
दोन्ही गटांमधील 25 ते 30 जणांवर कारवाई
याप्रकरणी प्रेमविवाह आणि कौटुंबिक वादातून दोन्ही गटांत हाणामारी झाल्याचे प्राथमिक तपासात समोर आले आहे. सार्वजनिक ठिकाणी शांतता भंग करून मारहाण केल्याप्रकरणी एका गटातील 18, तर दुसऱ्या गटातील 12 जणांविरुद्ध गुन्हा दाखल करण्यात आला असल्याची माहिती शिरूर पोलिसांनी दिली. दरम्यान, मलठण परिसरातील शिंदेवाडी येथील दोन कुटुंबांमध्ये हा वाद झाला असून, ही दोन्ही कुटुंबे एकमेकांचे नातेवाईक असल्याची माहिती पोलिस उपनिरीक्षक राहुल भागवत यांनी दिली.
