Thane Fire News : ठाणे : ठाण्यात भीषण आग लागल्याची घटनासमोर आली आहे. वाघबीळ भागात असलेल्या मढवी निवास या बंगल्याच्या पहिल्या मजल्यावर आग लागल्याची घटना पहाटे घडली. मात्र आग पहिल्या मजल्यावर लागली असली तरी त्या धुरामुळे दुसऱ्या मजल्यावरील दोघांचा मृत्यू झाला आहे. बंगल्याच्या पहिल्या मजल्यावर लागलेल्या आगीचा धूर दुसऱ्या मजल्यावरील खोलीत जाऊन या ठिकाणी झोपलेल्या दोघांचा मृत्यू झाल्याची दुर्दैवी घटना घडली. तर या धुरातून तिघे सुखरूप बाहेर आल्याने त्यांचा जीव थोडक्यात बचावला. घटनेची माहिती मिळताच अग्निशमन दल आणि ठाणे प्रादेशिक आपत्ती व्यवस्थापन पथकाच्या जवानांनी घडण्यासाठी धाव घेत आगीवर नियंत्रण मिळवत बचावकार्य केले.
आगीचे नेमके कारण अद्याप स्पष्ट झालेले नसून पोलीस याप्रकरणी अधिक तपास करत आहेत. मढवी निवास या बंगल्याच्या पहिल्या मजल्यावर आग लागल्याची घटना शनिवारी पहाटे घडली. यावेळी बंगल्यात एकाच परिवारातील पाच जण अडकले होते. त्यापैकी तीन जण सुखरूप आगीतून बाहेर पडले. तर घरातील दोन जणांना आगीचा त्रास होऊ लागल्याने ते बेशुद्ध पडले होते. त्यात त्यांचा मृत्यू झाला. अभिमन्यू मढवी (६०) आणि रमाबाई मढवी (५५) अशी आगीत मृत पावलेल्या दोघांची नावे आहेत. अग्निशमन दलाच्या जवानांनी दोघांना आगीतून बाहेर काढून नजीकच्या रुग्णालयात दाखल केले होते. मात्र, डॉक्टरांनी दोघांना मृत घोषित केले.
आगीतून तीन जण बचावले
घराच्या दुसऱ्या मजल्यावर झोपलेले अभिमन्यू व रमाबाई मढवी हे दाम्पत्य आगीत अडकले होते. त्यांचा या आगीत धुरामुळे गुदमरून मृत्यू झाला.मात्र, तीन जण बचावले त्याची नावे प्रणाली मढवी (३०), कविश मढवी (१३), पलाश मढवी (१२) आहेत. हे तिघेही या घरातील आगीतून सुखरूप बाहेर पडले.
