Dombivli Accident : राज्यात अपघातांची मालिका सुरूच आहे. डोंबिवलीमध्ये भरधाव वॅगनार कार थेट फुटपाथवर चढवल्याची धक्कादायक घटना घडली आहे. डोंबिवलीतील 90 फीट रोडवर ही घटना घडलीय. ड्रिंक अँड ड्राईव्हचा प्रकार असल्याची माहिती समोर आली आहे. मद्यधुंद अवस्थेत असणाऱ्या चालकाने गाडी थेट फुटपाथवर चढवली. यावेळी घटनास्थळी उपस्थित नागरिकांनी चालकासह कारमधील एका व्यक्तीला चांगलाच चोप देऊन संचार घेतला. नंतर पोलिसांच्या ताब्यात दिलं.
भरधाव वॅगनार कार थेट चढविली फुटपाथवर
डोंबिवलीतील 90 फीट रोडवरील कृष्णाई बंगल्यासमोर भरधाव वेगाने येणारी वॅगनार कार थेट फुटपाथवर चढली. यावेळी स्थानिक नागरिकांनी चालकाला गाडीतून बाहेर काढलं. नागरिकांनी चालकासह कारमध्ये असलेल्या दुसऱ्या व्यक्तीला मारहाण केली आहे. ते दोघेही दारू पिलेले असल्याची प्राथमिक माहिती पोलिसांनी दिली आहे. मद्यधुंद कारचालकाने डोंबिवली पेंढारकर कॉलेज समोर काही मोटरसायकलला धडक देत 90 फिट रोडवरील फुटपाथवर कार चढवली. यावेळी नागरिकांनी चालकाला चांगलाच चोप दिला आणि चालकाला पोलिसांच्या ताब्यात देण्यात आले.
वाहनचालकांचं नेमकं काय चाललंय?
पुण्यातील पोर्शे अपघात प्रकरण ताजचं असताना आता डोंबिवलीतही ड्रिंक अँड ड्राईव्हचा प्रकार घडल्याची माहिती समोर आला आहे. यामुळे रोज घडणाऱ्या अघटनांमुळे नागरिकांचा जीव टांगणीला लागला आहे. डोंबिवलीमध्ये घडलेल्या घटनेत चालकाने गाडी थेट फुटपाथवर चढवली, सुदैवाने यामध्ये कोणतीही जीवितहानी झाली नाही. मात्र, या घटनेवरून वाहनचालकांना नेमकं झालंय काय, असा प्रश्न आता उपस्थित करण्यात येत आहे.
