मुंबई : आयपीएस अधिकारी रश्मी शुक्ला या महाराष्ट्रात परतणार असल्याचं जवळपास निश्चित झालं आहे. परंतु, त्या डीजीपी होणार की मुंबई पोलीस आयुक्त म्हणून पदभार सांभाळणार याचा निर्णय मुख्यमंत्री एकनाथ शिंदे घेणार आहेत. तोपर्यंत डीजीपी पदाचा अतिरिक्त पदभार हा मुंबई पोलीस आयुक्त विवेक फणसाळकर यांच्याकडे देण्याचे आदेश मुख्यमंत्री एकनाथ शिंदे यांनी दिले आहेत.
शुक्रवार 29 डिसेंबर रोजीकेंद्रीय लोकसेवा आयोगाने बैठक घेतली. यावेळी राज्याच्या महासंचालक पदासाठी तीन अधिकाऱ्यांच्या नावांची यादी त्यांनी पाठवली आहे. यामध्ये रश्मी शुक्ला यांचं नाव आघाडीवर आहे. परंतु, त्यांना महासंचालकपदी बसवलं जाणार की मुंबई पोलीस आयुक्त म्हणून त्यांची वर्णी लागणार याचा निर्णय मुख्यमंत्री आणि गृहमंत्री दोघे मिळून घेणार आहेत. दरम्यान शनिवारपासून महासंचालकपदाचा अतिरिक्त पदभार मुंबईचे पोलीस आयुक्त विवेक फणसाळकर स्विकारतील. पोलीस महासंचालक रजनीश शेठ हे शुक्रवारी निवृत्त झाले. त्यामुळे अद्याप रश्मी शुक्ला यांना महाराष्ट्रात येण्यास थोडा वेळ असून या दरम्यान त्यांच्याकडे कोणता पदभार द्यायचा यासंदर्भातला निर्णय घेण्यात येईल.
पुणे पोलिसांनी वरिष्ठ पोलिस अधिकारी रश्मी शुक्ला यांच्यावर करण्यात आलेल्या फोन टॅपिंग प्रकरणात ‘क्लोजर रिपोर्ट’ दाखल केला आहे. यामध्ये काँग्रेस नेते नाना पटोले यांचा फोन बेकायदेशीरपणे टॅप केल्याचा आरोप त्यांच्यावर आहे. जर कोर्टाने असा अहवाल स्वीकारला की केस बंद केली जाते. एखादा गुन्हा चुकून नोंदवला गेला किंवा तक्रार दिवाणी स्वरूपाची असल्याचे आढळून आल्यास पोलिसांकडून ‘क्लोजर रिपोर्ट’ दाखल केला जातो.
