मुंबई : मुंबईमधून एक धक्कादायक बातमी समोर आली आहे. गोरेगावच्या वनराई पोलीस ठाण्याच्या हद्दीतील वसई बीचवर एका अज्ञाताने 20 वर्षीय मुलीवर लैगिंक अत्याचार केला आहे. अत्याचारानंतर पीडित तरुणी बीचवरच रडत बसलेली दिसून आली. तरुणीला बीचजवळील परिसरात रडताना पाहून काहींनी या घटनेची माहिती वनराई पोलिसांना कळवली. पोलिसांनी तातडीनं घटनास्थळी धाव घेत पीडित तरुणीला विचारपूस केली असता तिच्यावर बीचवर लैंगिक अत्याचार झाल्याची धक्कादायक माहिती समोर आली आहे.

वसई बीच सारख्या गजबलेल्या ठिकाणी एका 20 वर्षांच्या तरुणीवर अशाप्रकारे अत्याचार झाल्याने परिसरात एकच खळबळ उडाली आहे. या प्रकरणी पोलिसांकडून अज्ञात आरोपीवर बलात्कारासह इतर कलमांतर्गत गुन्हा दाखल करण्यात आली आहे. वनराई पोलीस आरोपीचा शोध घेत आहेत. त्यासाठी आसपासच्या परिसरातील सीसीटीव्ही कॅमेरे तपासण्यात येत आहेत.
मिळालेल्या माहितीनुसार, घटनेच्या दिवशी 20 वर्षीय पीडित तरुणी 22 जानेवारी रोजी वसई बीचवर फिरायला गेली होती. यावेळी एका अज्ञात व्यक्तीने तिच्यावर बळजबरी करत लैंगिक अत्याचार केला. अत्याचार केल्यानंतर पीडित तरुणी गोरेगाव रेल्वे स्थानकाजवळ बसून रडत होती. यावेळी याच परिसरातून जाणाऱ्या एकाने पीडित तरुणीला रडताना बघून वनराई पोलिसांना याविषयी माहिती दिली.

घटनेची माहिती मिळताच वनराई पोलीस तातडीने घटनास्थळी पोहोचले. पोलिसांनी पीडित तरुणीची विचारपूस करत तिला उपचारासाठी रुग्णालयात दाखल करण्यात आले. पीडित तरुणीची वैद्यकीय तपासणी केली असता तिच्या प्रायव्हेट पार्टमध्ये एक ब्लेड आणि दोन दगड आढळले आहेत. याप्रकरणी पोलिसांनी पीडितेच्या तक्रारीवरून अज्ञात आरोपीवर गुन्हा दाखल केला आहे. पोलीस या घटनेचा तपास करत आहेत.







