मुंबई: मुंबईतील एका युवा फुटबॉलपटूचा मृतदेह पालघरजिल्ह्यातील मेंढवण खिंड येथील घनदाट जंगलात संशयास्पद परिस्थितीत आढळल्यामुळे मोठी खळबळ उडाली आहे. हा तरुण पुण्यात फुटबॉल सामने खेळण्यासाठी जात असल्याचे घरी सांगून बाहेर पडला होता. या अचानक आणि दुर्दैवी घटनेमुळे परिसरात हळहळ व्यक्त होत असून, पोलिसांनी या प्रकरणाचा सखोल तपास सुरू केला आहे. मृत खेळाडूचे नाव सागर सोरती आहे. सागर 15 नोव्हेंबरला घरातून निघाला, मात्र 16 नोव्हेंबरनंतर त्याचा कुटुंबाशी संपर्क होऊ शकला नाही.
झाडाला गळफास लावलेल्या अवस्थेत मृतदेह:
कुटुंबीय सागरचा शोध घेत असतानाच, दोन दिवसांनंतर म्हणजेच 18 नोव्हेंबर रोजी कासा पोलिसांना मेंढवण खिंडच्या जंगलात एका झाडाला गळफास घेतलेल्या अवस्थेत एका तरुणाचा मृतदेह आढळला. घटनास्थळी त्याचा मोबाईल फोन असल्याने पोलिसांनी तात्काळ तपास सुरु केला.
मानसिक तणावामुळे टोकाचे पाऊल?
सागर सोरती मागील जवळपास 2 वर्षांपासून मानसिक तणावाखाली होता. तणावातून त्याने टोकाचे पाऊल उचलले असावे, असा प्राथमिक अंदाज पोलिसांनी व्यक्त केला आहे. या घटनेची नोंद कासा पोलीस ठाण्यात ‘अकस्मात मृत्यू’ म्हणून करण्यात आली आहे. मृत्यूचं नेमकं कारण शोधण्यासाठी पोलिस अधिक तपास करत आहेत.
