मुंबई: नवी मुंबईतील कोपरखैरणे (Mumbai Crime) परिसरात एका (Mumbai News) पित्याने आपल्या 9 वर्षांच्या अल्पवयीन मुलीसोबत लैंगिक आणि अश्लील वर्तन केल्याचा धक्कादायक प्रकार उघडकीस आला आहे. या प्रकरणी कोपरखैरणे पोलिसांनी आरोपीविरोधात विनयभंगासह पोक्सो कायद्यानुसार गुन्हा दाखल केला असून, त्याचा शोध सुरू आहे. या घटनेमुळे परिसरात संताप आणि खळबळ उडाली आहे.
पोलिसांनी दिलेल्या माहितीनुसार, आरोपी हा पीडित मुलीच्या आईसोबत राहत होता. त्याने आपल्या 9 वर्षांच्या मुलीला मोबाइलवर अश्लील व्हिडिओ दाखवून तिच्यासोबत गैरवर्तन केले. मुलीच्या आईला या प्रकाराची कल्पना आल्यानंतर तिने तातडीने कोपरखैरणे पोलीस ठाण्यात धाव घेतली. विशेष म्हणजे पीडित मुलीची आई मूकबधिर असल्याने पोलिसांना तिच्याशी संवाद साधण्यात अडचण येत होती. मात्र, पोलिसांनी तज्ज्ञांच्या मदतीने संवाद साधत तिच्याकडून संपूर्ण माहिती मिळवली आणि त्यावरून आरोपीविरोधात गंभीर गुन्हा दाखल करण्यात आला.
प्राथमिक तपासात असेही समोर आले आहे की आरोपीने यापूर्वीही त्या महिलेसोबत वाद घातले होते आणि तिच्यावर शारीरिक अत्याचार केल्याचा आरोप करण्यात आला आहे. मुलीसोबतच्या घटनेनंतर आईने धाडस दाखवत पोलिसांकडे तक्रार दिल्यामुळे आरोपीविरुद्ध कारवाईची प्रक्रिया वेगाने सुरू झाली आहे. “आम्ही आरोपीवर लक्ष ठेवून आहोत आणि त्याचा शोध घेण्यासाठी सर्वतोपरी प्रयत्न सुरू आहेत. पुढील तपासात अधिक माहिती समोर येईल,” असे कोपरखैरणे पोलिस ठाण्यातील एका वरिष्ठ अधिकाऱ्याने सांगितले.
या अमानुष प्रकारामुळे कोपरखैरणे परिसरात तणाव आणि संतापाचे वातावरण असून, स्थानिक रहिवाशांनी आरोपीला कठोर शिक्षा देण्याची मागणी केली आहे. पोलिसांनी नागरिकांना संयम राखून तपासाला सहकार्य करण्याचे आवाहन केले आहे.
