मुंबई : वाढत्या प्रदूषणामुळे मुंबईतील हवेची गुणवत्ता बिघडली असून त्याचा आरोग्यावर देखील परिणाम दिसू लागलं आहे. राज्य सरकार आणि पालिकेकडून मार्गदर्शक नियमावली काढण्यात आली होती. मात्र, नियमावली धाब्यावर बसवल्या जात असल्याचं चित्र पाहायला मिळालं. गुरुवार 21 डिसेंबर रोजी मुंबईतील हवेचा गुणवत्ता निर्देशांक हा 157 वर पोहचला होता. नवी मुंबईतील हवेचा एक्युआय मागील चोवीस तासांत 201 वर जात वाईट श्रेणीत गेलाय.
मुंबईसह पुण्याच्या हवेतही बिघाड झाल्याची माहिती समोर आलीये. पुण्याच्या प्रदुषणात देखील वाढ झाल्याचं पाहायला मिळालं आहे. पुण्याच्या हवेचा गुणवत्ता निर्देशांक हा 211 वर पोहचला आहे. ओ3 आणि पीएम 2.5 पोल्युटंटचे प्रमाण अधिक असल्याचं समोर आलंय.
अशातच, मुंबईत शेकोटीवर देखील बंदी घालण्यात आली असून पालिकेकडून प्रदूषणासंदर्भात कठोर पाऊलं उचलण्यात येणार असल्याचं सांगण्यात येत होतं. तसेच नियमावली जाहीर केली गेली होती. धूळ उडू नये यासाठी दिवसातून किमान 4-5 वेळा पाण्याची फवारणी करावी. रस्त्यांवरील धुळीचे प्रमाण कमी करण्यासाठी अॅण्टी स्मॉग मशीन लावाव्या लागतील. प्रत्येक बांधकामाच्या ठिकाणी स्वतंत्र वायू गुणवत्ता निर्देशांक मोजणारी यंत्रणा बसवावी.
सर्व 24 वॉर्डमध्ये सहाय्यक आयुक्तांच्या निर्देशानुसार दोन वॉर्ड अभियंता, एक पोलीस, एक मार्शल आणि एक वाहन अशा स्कॉडच्या माध्यमातून गस्त घालण्यात येईल. पण हे नियम देऊनही मुंबईच्या हवेत पुन्हा एकदा बिघाड झाला आहे. दरम्यान जर या नियमांचे पालन केले नाही, तर दंडात्मक कारवाई करण्याचे निर्देश देखील देण्यात आले होते. त्यामुळे आता पालिका कोणती कठोर पावलं उचलणार हे पाहणं महत्त्वाचं ठरेल.
