Nalasopara News : नालासोपारा शहरातून एक धक्कादायक घटना समोर आली आहे. सोमवारी सकाळी एका बैठ्या चाळीतील बंद खोलीत ८ वर्षीय मुलीचा मृतदेह आढळून आला आहे. चांदनी साह असे या मयत मुलीचं नाव आहे. या बंद खोलीत प्लास्टिकच्या गोणीत मुलीचा मृतदेह कुजलेल्या अवस्थेत होता. पोलिसांना या घटनेची माहिती मिळताच त्यांनी तात्काळ घटनास्थळी धाव घेतली. तसेच मृतदेह ताब्यात घेतला असून शवविच्छेदनासाठी पाठवण्यात आला आहे.
मिळालेल्या अधिक माहितीनुसार, वसई पूर्वेच्या वाण्याचा पाडा येथे चांदनी साह ही मुलगी आई वडील आणि भावंडासह रहात होती. तिचे वडील मॅकेनिकचे काम करतात. चांदनी या परिसरातच जिल्हा परिषद शाळेच्या इयत्ता तिसरीत शिकत होती. शनिवारी १ डिसेंबर रोजी ती शाळेतून घरी आली. घरी आल्यावर तिने एक आयस्क्रिम खाल्ल.
त्यानंतर कपडे बदलून ती मित्रांसह बाहेर खेळण्यासाठी गेली. आपली मुलगी कुठे गेली यासाठी कुटुंबियांची शोधाशोध सुरू केली. चाळीतल्या सर्व घरांमध्ये तिचा शोध घेतला. रात्र झाली तरी ती घरी परतली नाही. याप्रकरणी तिच्या कुटुंबियांनी रात्री उशीरा पेल्हार पोलीस ठाण्यात ती बेपत्ता असल्याची तक्रार दाखल केली होती.
दरम्यान, पोलिसांनी संपूर्ण शहरात चांदनीचा शोध सुरू असताना सोमवारी अचानक मुलगी राहत असलेल्या चाळींच्या शेजारील चाळीतील ५ नंबर खोलीतून कुजलेला वास येऊ लागला. दुपारनंतर कुजलेला वास आणखी वाढू लागल्याने चाळीतील नागरिकांनी खोलीचे दार उघडले. यावेळी तिचा मृतदेह बंद खोलीत आढळून आला.
आपल्या मुलीची शेजारच्या चाळीत मृत्यूशी झूंज
गेल्या ३ दिवसांपासून आपली मुलगी बेपत्ता आहे. मात्र ती आपल्याच शेजारच्या चाळीत मृत्यूशी झूंज देत असेल याची कुटुंबियांना काहीच कल्पना नव्हती. मुलीसोबत नेमकं काय घडलं? तिचा मृत्यू कसा झाला? हा घातपात आहे का? असे अनेक प्रश्न निर्माण झाले आहेत.
