Mhada Lottery: मुंबई : मुंबईत स्वतःचे घर घेण्याचे स्वप्न पाहणाऱ्या नागरिकांसाठी महाराष्ट्र गृहनिर्माण व क्षेत्रविकास प्राधिकरण यांनी प्रथम येणाऱ्यास प्रथम प्राधान्य या योजनेअंतर्गत 118 घरांची थेट विक्री सुरू केली आहे. ही घरे यापूर्वी दोन किंवा अधिक वेळा सोडतीत न विकली गेल्यामुळे आता लॉटरीशिवाय थेट खरेदीसाठी उपलब्ध करून देण्यात आली आहेत. त्यामुळे इच्छुक नागरिकांना संधी मिळणार असली तरी नव्या अटींमुळे खरेदीदारांमध्ये चिंता निर्माण झाली आहे.
या योजनेत घरासाठी अर्ज केल्यानंतर अर्जदाराला आधी अनामत रक्कम भरावी लागणार आहे. ही रक्कम भरल्यानंतर 48 तासांच्या आत घराच्या एकूण किमतीपैकी 10 टक्के रक्कम भरणे बंधनकारक करण्यात आले आहे. ही रक्कम वेळेत न भरल्यास संबंधित घरावरील दावा आपोआप रद्द होणार असून भरलेली अनामत रक्कम परत मिळणार नाही. ही अनामत रक्कम 1 लाख ते 6 लाख रुपयांपर्यंत असू शकते.
या घरांसाठी नोंदणी प्रक्रिया 17 फेब्रुवारीपासून सुरू झाली असून शेवटचे घर विकले जाईपर्यंत नोंदणी सुरू राहणार आहे. 4 मार्चपासून अर्ज सादर करणे आणि अनामत रक्कम भरण्याची प्रक्रिया सुरू होईल. या योजनेतील महत्त्वाची बाब म्हणजे अर्जदाराकडे आधीपासून घर असले तरीही तो या योजनेत घर खरेदी करू शकतो.
या योजनेतील घरांच्या किमती 31 लाख रुपयांपासून ते थेट 8 कोटी रुपयांपर्यंत आहेत. मात्र परवडणाऱ्या किमतीतील घरांची संख्या कमी असल्यामुळे सर्वसामान्य नागरिकांमध्ये नाराजी व्यक्त केली जात आहे. काही घरांच्या किमती बाजारभावापेक्षा जास्त असल्याची चर्चा देखील सुरू आहे.
या पार्श्वभूमीवर ही घरे खरेदीदारांना कितपत आकर्षित करतील की पुन्हा विक्रीअभावी राहतील, याकडे सर्वांचे लक्ष लागले आहे. नागरिकांनी अर्ज करण्यापूर्वी अटी व शर्ती काळजीपूर्वक वाचाव्यात, असे आवाहन करण्यात आले आहे.
