मुंबई: जागा काँग्रेस, राष्ट्रवादी असो की शिवसेनेची, सर्व जागा निवडून आणणार,असा निर्धार महाविकास आघाडीच्या पहिल्याच बैठकीत झाल्याची माहिती खासदार संजय राऊत यांनी दिली. आगामी लोकसभा निवडणुकीच्या जागावाटपाच्या चर्चेसाठी महाविकास आघाडीची पहिली बैठक गुरुवारी मुंबईत पार पडली. या बैठकीनंतर तिन्ही पक्षाच्या प्रमुख नेत्यांनी माध्यमांशी संवाद साधला.
लोकसभा निवडणुकीच्या पार्श्वभूमीवर महाविकास आघाडीची आज बैठक पार पडली. या बैठकीत राज्यातील सर्व 48 जागांवर चर्चा झाल्याची माहिती शिवसेनेचे खासदार संजय राऊत म्हणाले. वंचित बहुजन आघाडीचे प्रकाश आंबेडकर, शेतकरी संघटनेचे राजू शेट्टी यांच्यासोबत आमची चर्चा सुरू असून 30 तारखेच्या बैठकीला ते असतील, असा विश्वास त्यांनी व्यक्त केला. जागा कुणाच्याही वाटेला जावो, सर्व जागा निवडून आणण्याचा निर्धार या बैठकीत करण्यात आला
राज्यातील सर्व म्हणजे 48 जागा हा कोणत्याही एका पक्षाच्या असतील असं न मानता आम्ही महाविकास आघाडीच्या जागा म्हणूनच लढवणार आहे, महाविकास आघाडीच्या आजच्या बैठकीत सविस्तर चर्चा झाल्याचे शिवसेनेचे खासदार संजय राऊत यांनी सांगितले. तसेच प्रकाश आंबेडकर यांच्याशी चर्चा झाल्याचे सांगत आम्ही सातत्याने त्यांच्या संपर्कात असल्याचे ही संजय राऊत यांनी सांगितले.
