मुंबई: मुंबईतील वर्षा या शासकीय निवासस्थानी 68 व्या महाराष्ट्र केसरी कुस्ती स्पर्धेच्या (Maharashtra Kesari Wrestling Competition) अधिकृत बोधचिन्हाचे अनावरण आणि मानाच्या गदेचे पूजन राज्याचे मुख्यमंत्री देवेंद्र फडणवीस (Devendra Fadanavis) यांच्या हस्ते पार पडले. अत्यंत उत्साहपूर्ण वातावरणात झालेल्या या कार्यक्रमात आगामी स्पर्धेच्या आयोजनाची माहिती देण्यात आली. (Latest Marathi News)
महाराष्ट्र राज्य कुस्तीगीर संघाच्या मान्यतेने आणि रामकृष्ण सातव पाटील यांच्या वतीने यंदाची महाराष्ट्र केसरी कुस्ती स्पर्धा 18 मार्च ते 22 मार्च 2026 दरम्यान आयोजित करण्यात येणार आहे. राज्यभरातील नामांकित मल्ल या स्पर्धेत सहभागी होणार असून पारंपरिक कुस्तीप्रेमींमध्ये या स्पर्धेबाबत मोठी उत्सुकता निर्माण झाली आहे.
कार्यक्रमादरम्यान मुख्यमंत्री देवेंद्र फडणवीस यांनी स्पर्धेच्या नियोजनाची माहिती घेतली आणि यंदाच्या महाराष्ट्र केसरी स्पर्धेचे भव्य आयोजन केल्याबद्दल आयोजक रामकृष्ण सातव पाटील यांचे विशेष कौतुक केले. कुस्ती हा महाराष्ट्राच्या परंपरेचा महत्त्वाचा भाग असून अशा स्पर्धांमुळे राज्यातील मल्लांना प्रोत्साहन मिळते, असे त्यांनी यावेळी सांगितले.
या स्पर्धेच्या समारोप सोहळ्यास प्रमुख पाहुणे म्हणून उपस्थित राहण्याचे निमंत्रण आयोजक रामकृष्ण सातव पाटील यांनी मुख्यमंत्री फडणवीस यांना दिले असून त्यांनी ते स्वीकारले आहे. समारोप समारंभात यंदाच्या महाराष्ट्र केसरी विजेत्याला मुख्यमंत्री यांच्या हस्ते मानाची गदा आणि फॉर्च्युनर कार देऊन सन्मानित करण्यात येणार आहे.
या कार्यक्रमाला केंद्रीय राज्यमंत्री आणि महाराष्ट्र राज्य कुस्तीगीर संघाचे उपाध्यक्ष मुरलीधर मोहोळ, महाराष्ट्र राज्य कुस्तीगीर संघाचे सरचिटणीस पै. योगेश दोडके, पुणे जिल्हा कुस्तीगीर संघाचे अध्यक्ष मेघराज कटके, नगरसेवक अनिल सातव पाटील यांच्यासह कृष्णाजी बुचडे, नटराज सातव पाटील, सुनील जाधवराव, राहुल सातव, केतन जाधव, सागर सातव, महेश माने, मुकेश सातव, संदीप वारे, मयूर सातव आणि इतर मान्यवर उपस्थित होते.
महाराष्ट्र केसरी ही राज्यातील प्रतिष्ठेची कुस्ती स्पर्धा मानली जाते. या स्पर्धेतून अनेक नामांकित मल्ल पुढे आले असून ग्रामीण भागातील कुस्ती संस्कृतीला चालना देण्यात या स्पर्धेची महत्त्वाची भूमिका राहिली आहे. त्यामुळे यंदाच्या स्पर्धेकडेही राज्यातील कुस्तीप्रेमींचे लक्ष लागले आहे.
