मुंबई : मुख्यमंत्री माझी लाडकी बहीण योजनेच्या मे महिन्याच्या हप्त्याबाबत दोन महत्त्वाच्या घडामोडी समोर आल्या आहेत. अनुसूचित जाती प्रवर्गातील महिला लाभार्थ्यांसाठी सामाजिक न्याय विभागाने महिला व बालविकास विभागाकडे 344 कोटी रुपयांचा निधी वर्ग करण्यास मंजुरी दिली आहे. त्यामुळे मे महिन्याच्या हप्त्याच्या वितरणाचा मार्ग मोकळा झाला आहे.
मुख्यमंत्री माझी लाडकी बहीण योजनेअंतर्गत पात्र महिलांना दरमहा आर्थिक सहाय्य दिले जाते. या योजनेतील अनुसूचित जाती प्रवर्गातील लाभार्थ्यांच्या वाट्याचा निधी सामाजिक न्याय विभागामार्फत उपलब्ध करून दिला जातो. त्यानुसार 10 जून रोजी जारी करण्यात आलेल्या शासन निर्णयाद्वारे 344 कोटी रुपये वितरीत करण्यास मंजुरी देण्यात आली आहे.
दरम्यान, भाजपच्या शेवगाव-पाथर्डी मतदारसंघाच्या आमदार मोनिका राजळे यांनी लाभार्थी महिलांना मे महिन्याचा हप्ता लवकरच मिळणार असल्याची माहिती दिली आहे. त्यांच्या म्हणण्यानुसार, लाभार्थ्यांच्या बँक खात्यात हप्त्याची रक्कम 12 ते 15 जून दरम्यान जमा होण्याची शक्यता आहे.
मात्र हप्त्याचे वितरण नेमक्या कोणत्या दिवसापासून सुरू होणार याबाबत राज्य सरकारकडून अद्याप अधिकृत घोषणा करण्यात आलेली नाही. त्यामुळे राज्यभरातील लाखो लाभार्थी महिलांचे लक्ष आता महिला व बालविकास विभागाच्या पुढील निर्णयाकडे लागले आहे.
निधी मंजुरीची प्रक्रिया पूर्ण झाल्याने हप्त्याचे वितरण लवकरच सुरू होईल, अशी अपेक्षा व्यक्त केली जात आहे. लाभार्थी महिलांनी बँक खात्याची माहिती आणि आधार संलग्नतेसह आवश्यक कागदपत्रांची पडताळणी करून ठेवावी, असे आवाहनही प्रशासनाकडून वेळोवेळी करण्यात येत आहे.
