मुंबई : मुंबईतील शताब्दी रुग्णालयात एक धक्कादायक प्रकार उघडकीस आला आहे. रुग्णालयातील एका सफाई कर्मचाऱ्याने बाथरुममध्ये महिलेचा व्हिडिओ रेकॉर्ड केल्याची घटना समोर आली आहे. ही घटना शनिवार 2 डिसेंबर रोजी घडली असून या प्रकरणी गोवंडी पोलिसांनी गुन्हा दाखल करून आरोपीला अटक केली आहे. अशोक गुप्ता अस अटक केलेल्या आरोपीच नाव आहे. तो शताब्दी रुग्णालयात सफाई कामगार म्हणून काम करत आहे.
अधिकाऱ्याने सांगितलेल्या माहितीनुसार, शनिवारी 27 वर्षीय मुलगी रुग्णालयात एका कॉन्फरन्समध्ये गेली होती. त्यावेळी फ्रेश होण्यासाठी ती तिच्या वसतीगृहात गेली होती. यावेळी ती फ्रेश होत असताना. सफाई कामगाराने बाथरुममध्ये डोकावून महाविद्यालयातील वैद्यकीय विद्यार्थिनीचा व्हिडिओ रेकॉर्डिंग करण्याचा प्रयत्न केला. दरम्यायान, या वसतीगृहामध्ये पुरुष आणि महिलांचे स्नानगृह शेजारीच असल्याचं तेथील अधिकाऱ्याने सांगितलं.
असा केला व्हिडिओ काढण्याचा प्रयत्न?
दोन डिसेंबर रोजी शताब्दी रुग्णालयात 27 वर्षीय मुलगी तिच्या कॉन्फरन्समसाठी गेली होती. त्यानंतर ती फ्रेश होण्यासाठी तिच्या वसतीगृहावर आली. त्यावेळी महिला अंघोळ करत असताना रुग्णालयातील एका रोजंदारी कर्मचाऱ्याने भिंतींवर चढून तिचा व्हिडिओ काढण्याचा प्रयत्न केला. मुलीच्या लक्षात येताच तिने आरडा ओरडा करण्यास सुरुवात केली. त्यामुळे तो तिथून पळून गेला.
वसतीगृहात महिला आणि पुरुषांचे स्नानगृह शेजारी
मुलीच्या तक्रारीवरुन पोलिसांनी गुन्हा दाखल केला असून आरोपीला तात्काळ अटक करून सध्या न्यायालयीन कोठडीत पाठवण्यात आलं आहे. मात्र, या वसतीगृहात महिला आणि पुरुषांचे स्नानगृह शेजारी असल्याची माहिती स्थानिक अधिकाऱ्याने दिली आहे. दरम्यान, या संपूर्ण प्रकारावरुन रुग्णालयाच्या प्रशासनावर नागरिकांनी अनेक प्रश्न उपस्थित केले असून पोलिसांच्या तपासात आणखी कोणत्या गोष्टी उघडकीस येणार का? तसेच रुग्णालय प्रशासनावर पोलीस कारवाई करणार का? हे पाहणं महत्त्वाचं ठरणार आहे.
