डॉ. अशोक बालगुडे

मुंबई : सत्तेत एकत्र, पण निर्णयांवर दुमत! राज्य कामगार विमा सोसायटीच्या (ESIS) वैद्यकीय संचालकपदी डॉ. अशोक थोरात यांच्या नियुक्तीवरून भाजप आणि शिवसेनेत नवा वाद पेटला आहे. भाजप आमदार नमिता मुंदडा यांनी या नियुक्तीवर आक्षेप घेत आरोग्य खात्याच्या कारभारावर प्रश्नचिन्ह उपस्थित केले आहे. सत्तेच्या खुर्च्या वाटून घेताना निर्णयांची जबाबदारी मात्र एकमेकांवर ढकलली जात असल्याचे या वादातून समोर आले आहे.
बीडमधील कोविड मदतकार्याच्या आर्थिक अनियमिततेप्रकरणी डॉ. थोरात यांना यापूर्वी निलंबित करण्यात आले होते. नाशिकमधील कथित ३.३७ कोटींच्या कोविड आयसीयू प्रकरणासह अन्य आरोपांचाही मुंदडा यांनी पाठपुरावा केला आहे. निलंबन मागे घेऊन नियुक्ती दिल्याने त्यांनी विधानसभेतही आवाज उठवला. संशयाच्या भोवऱ्यातील अधिकाऱ्याला महत्त्वाच्या पदावर बसवताना शासनाने नेमकी कोणती कसोटी लावली, असा सवाल या निमित्ताने उपस्थित झाला आहे.

या नियुक्तीवरून भाजपने आक्षेप घेतल्याने महायुतीतील अंतर्गत मतभेद पुन्हा चव्हाट्यावर आले आहेत. आरोग्य विभागातील नियुक्त्या, चौकशी आणि प्रशासकीय निर्णयांवर राजकीय हस्तक्षेप होत असल्याचा आरोप-प्रत्यारोपांचा सूर आता अधिक तीव्र होण्याची चिन्हे आहेत. सत्तेतले सहकारीच निर्णयांवर बोट ठेवत असतील, तर विरोधकांना टीकेसाठी आयते कोलीत मिळाल्याशिवाय राहणार नाही.
डॉ. थोरात यांनी आरोप फेटाळत वरिष्ठ अधिकाऱ्यांकडून चौकशी करण्याची तयारी दर्शवली आहे. मात्र, नियुक्तीचा निर्णय वादात सापडल्याने सरकारला त्याचे समर्थन करावे लागणार आहे. आरोपांचे धुके दूर करून नियुक्तीचा निकष स्पष्ट करण्याची जबाबदारी सरकारचीच; अन्यथा पारदर्शक कारभाराच्या घोषणांना संशयाची सावली लागण्यास वेळ लागणार नाही.







