फुरसुंगी, ता. 22 : शरीराविरुद्ध गंभीर स्वरूपाचे गुन्हे करून परिसरात दहशत निर्माण करणाऱ्या सराईत गुन्हेगारावर फुरसुंगी पोलिसांनी महाराष्ट्र झोपडपट्टीदादा प्रतिबंधक कायद्यान्वये (एमपीडीए) कठोर कारवाई केली आहे.

प्रणव महादेव शिंदे (वय 23, रा. के.के. हाईट्स, गजानन नगर, पावर हाऊस, भेकराईनगर, फुरसुंगी) असे स्थानबद्ध करण्यात आलेल्या आरोपीचे नाव असून, त्याला एक वर्षासाठी चंद्रपूर जिल्हा कारागृहात स्थानबद्ध करण्याचे आदेश पोलीस आयुक्तांनी दिले आहेत.
पोलिसांनी दिलेल्या माहितीनुसार, प्रणव शिंदे याच्याविरुद्ध यापूर्वी हडपसर, फुरसुंगी आणि खराडी पोलीस ठाण्यांत शरीराविरुद्ध तसेच इतर गंभीर स्वरूपाचे एकूण चार गुन्हे दाखल आहेत. यामध्ये दरोड्याची तयारी, शस्त्र बाळगणे, मारहाण, धमकी, बेकायदा जमाव जमविणे तसेच जबरी चोरीसारख्या गंभीर गुन्ह्यांचा समावेश आहे.

विशेष म्हणजे, दाखल गुन्ह्यांमध्ये जामिनावर बाहेर आल्यानंतरही त्याच्या गुन्हेगारी कृत्यांना आळा बसत नव्हता. तो वारंवार शरीराविरुद्ध गंभीर गुन्हे करून सार्वजनिक सुव्यवस्थेला बाधा पोहोचवत असल्याचे पोलिसांच्या तपासात निष्पन्न झाले. त्याच्या गुन्हेगारी कृत्यांमुळे परिसरातील नागरिकांच्या सुरक्षिततेचा प्रश्न निर्माण झाला होता.
या पार्श्वभूमीवर फुरसुंगी पोलिसांनी त्याच्या गुन्हेगारी कारवायांचा सखोल आढावा घेत एमपीडीए कायद्यान्वये एक वर्षासाठी स्थानबद्ध करण्याचा प्रस्ताव वरिष्ठ कार्यालयाकडे पाठविला होता. या प्रस्तावाला पोलीस आयुक्त अमितेश कुमार यांनी मंजुरी देत प्रणय शिंदे याला एक वर्षासाठी स्थानबद्ध करून चंद्रपूर जिल्हा कारागृहात ठेवण्याचे आदेश दिले. त्यानुसार पोलिसांनी त्याला ताब्यात घेऊन चंद्रपूर जिल्हा कारागृहात रवाना केले आहे.
वरिष्ठ अधिकाऱ्यांच्या मार्गदर्शनाखाली कारवाई
ही कारवाई पोलीस आयुक्त अमितेश कुमार, सहपोलीस आयुक्त संजय दराडे, अपर पोलीस आयुक्त मनोज पाटील, पोलीस उपायुक्त जीवन बेनिवाल आणि सहायक पोलीस आयुक्त अनुराधा उदमले यांच्या मार्गदर्शनाखाली करण्यात आली.
फुरसुंगी पोलीस ठाण्याचे वरिष्ठ पोलीस निरीक्षक अमोल मोरे, पोलीस निरीक्षक (गुन्हे) राजेश खांडे, पोलीस उपनिरीक्षक बापूसाहेब खंदारे, पोलीस हवालदार महेश उबाळे, नंदू चव्हाण आणि पोलीस अंमलदार चेतन साळुंखे यांनी या कारवाईत सहभाग घेतला.






