मुंबई: मुंबईच्या मालाड पश्चिमेकडील एका शॉपिंग मॉलला आग लागल्याची घटना घडली आहे. संध्याकाळी 6.45 वाजण्याच्या सुमारास ही आग लागली आहे. मालाड पश्चिमधील जैन मंदिर रोडवरील ऍकमे शॉपिंग सेंटरला ही आग लागली आहे. ऍकमे शॉपिंग मॉल मधील पहिल्या मजल्यावरील वातानुकूलित यंत्राला ही आग लागली असल्याची माहिती मिळत आहे. या आगीत कोणतीही जीवितहानी झाली नसल्याचे वृत्त आहे.
या आगीची माहिती मिळताच मुंबई अग्निशमन दलाच्या 5 गाड्या घटनास्थळी दाखल झाल्या आहेत. शॉपिंग मॉलला लागलेली आग ही लेव्हल 1 ची आहे. घटनास्थळावर अग्निशमन दलाच्या जवानांसोबात मालाड पोलीस ठाण्याचे अधिकारी आणि अदानी इलेक्ट्रिसिटीचे कर्मचारी देखील पोहोचले आहेत. सुदैवाने या आगीत कोणतीही जीवित हानी झाली नसून अग्निशमन दलाच्या जवानांकडून आगीवर नियंत्रण मिळण्याचे प्रयत्न सुरू आहेत.
