मुंबई: संपूर्ण राज्याला हादरवणाऱ्या ससून ड्रग्स प्रकरणातील आरोपी ललित पाटील याला पोलिसांनी अटक केली आहे. दरम्यान, ललित पाटीलला वैद्यकीय तपासणीसाठी रुग्णालयात आणण्यात आले आहे. त्यावेळी प्रसारमाध्यमांशी बोलण्याचा प्रयत्न करत, ललित पाटील याने धक्कादायक दावा केला आहे. मी ससून रुग्णालयातून पळून गेलो नव्हतो, तर मला पळवण्यात आलं होतं. या पाठीमागे कुणाकुणाचा हात आहे, हे मी सर्व सांगणार आहे, असा दावा ललित पाटीलने केला आहे.
ड्रग्स रॅकेट प्रकरणातील मुख्य आरोपी ललित पाटील याचा भाऊ भूषण पाटील व अभिषेक बलकवडे या दोघांना पुणे पोलिसांनी १० ऑक्टोबर रोजी नेपाळच्या सीमेवर अटक केली होती. तसेच फरार असलेल्या ललित पाटील याचा शोध सुरु होता. अखेर बुधवारी त्याच्या चेन्नई येथून मुसक्या आवळण्यात आला. ललित पाटील हा श्रीलंकेमध्ये जाण्याच्या तयारीत होता, असा दावा करण्यात येत आहे. दरम्यान, अटक करण्यात आल्यानंतर ललित पाटीलला मुंबईत आणण्यात आले आहे. तसेच त्याची वैद्यकीय तपासणी करण्यासाठी त्याला रुग्णालयामध्ये दाखल करण्यात आलं आहे. त्यानंतर पाटील याला न्यायालयात हजर करण्यात येणार आहे.
