मुंबई : पुण्यातील नवविवाहितेचा पनवेल तालुक्यातील माची प्रबळगडावरून पडून मृत्यू झाल्याची घटना घडली आहे. सेल्फी काढताना पाय घसरल्याने प्रबळगडावरून पडून २४ वर्षीय नवविवाहितेचा मृत्यू झाल्याची घटना २८ डिसेंबरला घडली. शुभांगी पटेल (दत्तवाडी, पुणे) असे मृत महिलेचे नाव आहे. पती-पत्नी ट्रेकिंगकरिता गेले असताना सेल्फी काढताना पाय घसरून ती खाली पडल्याने तिचा मृत्यू झाला. शुभांगी व विनायक यांचे ८ डिसेंबर २०२३ रोजी वीस दिवसांपूर्वी लग्न झाले होते. या घटनेची नोंद पनवेल तालुका पोलीस ठाण्यात करण्यात आली आहे.
शुभांगी आणि तिचा पती विनायक पटेल हे दोघे २८ डिसेंबरला पर्यटनासाठी लोणावळा येथे गेले होते. तेथून दुपारी २ च्या सुमारास पनवेलमधील माची प्रबळ येथे ट्रेकिंग करताना सेल्फी काढण्याच्या नादात शुभांगीचा पाय घसरला आणि ती खाली पडली. पनवेल तालुका पोलीस घटनास्थळी दाखल होत स्थानिक संघटनेच्या मदतीने नवविवाहितेला बाहेर काढले. तिला रुग्णालयात दाखल केले असता डॉक्टरांनी मृत घोषित केले.
माची प्रबळगडावर ट्रेकिंगला गेलेल्या अनेकांचा यापूर्वी गडावरून पडून मृत्यू झालेला आहे. तरीदेखील नागरिक ट्रेकिंगचा अनुभव नसताना या ठिकाणी येतात. अशा पर्यटकांना अटकाव घालावा, अशी मागणी नागरिक करत आहेत.
