मुंबई : राष्ट्रवादी काँग्रेसचे अध्यक्ष शरद पवार गटाचे युवक अध्यक्ष मेहबूब शेख यांच्यावर गुन्हा दाखल करण्यात आला आहे. शेख यांच्यावर अ‍ॅट्रोसिटीच्या कलमाअंतर्गत गुन्हा दाखल करण्यात आला आहे. आमदार निवासमधील खोली क्रमांक ४०६ मध्ये असताना मेहबूब शेख यांनी एका तरुणाला मारहाण केल्याचा आरोप आहे.
विशेष म्हणजे या प्रकरणी फिर्यादी तरुणावरही गुन्हा दाखल होणार असल्याची माहिती मिळत आहे. मरीन ड्राईव्ह पोलिसांनी दोघांवर क्रॉस एफआयआर दाखल केला आहे. मेहबुब शेख यांची रात्री उशिरापर्यंत मरीन ड्राईव्ह पोलीस चौकशी करीत होते. याप्रकरणात अद्याप कुणालाही अटक करण्यात आलेली नाही. या घटनेने राजकीय वर्तुळात एकच खळबळ उडाली आहे.
काय आहे प्रकरण?
महेबूब शेख काल रात्री आमदार निवास येथे आमदार संदीप क्षीरसागर यांच्या रुमवर मुक्कामी होते. यादरम्यान एक तरुण मद्यधुंद अवस्थेत क्षीरसागर यांच्या रुमवर येऊन मुक्कामाचा हट्ट करु लागला. त्यावरुन दोघांमध्ये वाद झाल्याची माहिती समोर आली आहे. यावरुन दोघांमध्ये बाचाबाची झाली. यावेळी झालेल्या बाचाबाचीनंतर शिवीगाळ केल्याने मेहबूब शेख यांच्याकडून मारहाण झाल्याचा आरोप फिर्यादी तरुणाने केला आहे. हा वाद मरीन ड्राईव्ह पोलीस ठाण्यापर्यंत पोहोचला आहे.
