Asha Bhosle Funeral: मुंबई: भारतीय संगीत क्षेत्रातील एक तेजस्वी तारा निखळला असून ज्येष्ठ गायिका आशा भोसले यांनी वयाच्या 93 व्या वर्षी जगाचा निरोप घेतला आहे. त्यांच्या निधनामुळे संपूर्ण देशावर शोककळा पसरली असून संगीत प्रेमी हळहळ व्यक्त करत आहेत. आशाताईंना काही दिवसांपूर्वी प्रकृती खालावल्यामुळे मुंबईतील ब्रीच कँडी रुग्णालयात दाखल करण्यात आले होते. मात्र उपचार सुरू असतानाच 12 एप्रिल रोजी त्यांची प्राणज्योत मालवली. त्यांच्या जाण्याने संगीतातील एका सुवर्ण युगाचा अंत झाल्याची भावना व्यक्त होत आहे.
आशाताईंच्या निधनाची बातमी समजताच चित्रपट आणि राजकीय क्षेत्रातील अनेक दिग्गजांनी त्यांचे अंत्यदर्शन घेतले. बॉलिवूडचे महानायक अमिताभ बच्चन यांनी सोशल मीडियाच्या माध्यमातून अत्यंत भावूक श्रद्धांजली वाहिली आहे. त्यांनी आपल्या संदेशात म्हटले की, एक संपूर्ण युग संपले असून त्यांचा आवाज जगासाठी नेहमीच अमर राहील. आशाताईंच्या पार्थिवाचे दर्शन घेण्यासाठी सचिन तेंडुलकर, ए. आर. रहमान आणि विद्या बालन यांच्यासह अनेक मोठे कलाकार त्यांच्या निवासस्थानी पोहोचले होते. आशाताईंनी आपल्या प्रदीर्घ कारकिर्दीत 11 हजारांपेक्षा जास्त गाणी गाऊन रसिकांच्या मनावर राज्य केले आहे.
आज 13 एप्रिल रोजी आशा भोसले यांच्यावर मुंबईतील शिवाजी पार्क स्मशानभूमीमध्ये शासकीय इतमामात अंत्यसंस्कार करण्यात येणार आहेत. त्यांचे पार्थिव तिरंग्यात लपेटण्यात आले असून पोलीस सलामीसह त्यांना अखेरचा निरोप दिला जाईल. या दुःखद प्रसंगात सर्वांचे लक्ष त्यांचे बंधू हृदयनाथ मंगेशकर यांच्याकडे लागले आहे. आशाताईंवर अंत्यसंस्कार पार पडल्यानंतर हृदयनाथ मंगेशकर पुण्यात एक विशेष पत्रकार परिषद घेणार आहेत. सायंकाळी 7 वाजता होणाऱ्या या परिषदेत ते कोणती मोठी घोषणा करणार, याबद्दल सध्या मोठी उत्सुकता निर्माण झाली आहे. संगीत विश्वातील या महामेरूला निरोप देताना प्रत्येक भारतीयाचे डोळे आज पाणावले आहेत.
