डॉ. अशोक बालगुडे
मुंबई : सणासुदीच्या काळात सोन्या-चांदीच्या खरेदीला वेग येण्याची अपेक्षा असतानाच या मौल्यवान धातूंच्या दरांमध्ये सुरू असलेल्या घसरणीने बाजारातील समीकरण बदलले आहे. धनत्रयोदशी जवळ येत असताना वायदे बाजारात दरांवरील दबाव कायम असल्याने गुंतवणूकदारांसह दागिने खरेदी करणाऱ्या ग्राहकांमध्येही संभ्रम निर्माण झाला आहे. दर कमी होत असल्याने खरेदीची संधी निर्माण झाली आहे की आणखी घसरण होण्याची शक्यता आहे, असा प्रश्न आता ग्राहकांना पडला आहे.
आंतरराष्ट्रीय बाजारातील घडामोडींचा परिणाम भारतीय सराफा बाजारावरही होत आहे. कच्च्या तेलाच्या वाढत्या किमतींमुळे महागाईची चिंता वाढली आहे. अमेरिकेतील व्याजदरविषयक धोरण, डॉलरची ताकद आणि रोख्यांवरील वाढते परतावे यांचाही सोन्याच्या आकर्षणावर परिणाम होत आहे. सोन्याच्या तुलनेत चांदीच्या दरातील घसरण अधिक तीव्र दिसत असल्याने दोन्ही धातूंच्या बाजारातील अस्थिरता ठळक झाली आहे.
धनत्रयोदशीला सोने खरेदी शुभ मानणाऱ्या ग्राहकांसाठी ही परिस्थिती महत्त्वाची आहे. दरातील घसरणीचा फायदा घेऊन खरेदी करावी की आणखी काही दिवस थांबावे, याबाबत निर्णय घेणे कठीण झाले आहे. मात्र, केवळ अल्पकालीन दरघसरण पाहून गुंतवणुकीचा निर्णय घेणे जोखमीचे ठरू शकते. दागिने खरेदी करताना त्या दिवसाचा प्रत्यक्ष सराफा दर, घडणावळ आणि अन्य आकारणी तपासणेही आवश्यक आहे.
