Maharashtra Politics : पुणे : शिंदे गटाच्या मंत्र्यांच्या विदेश दौऱ्यावरून गेल्या काही दिवसांपासून आरोप-प्रत्यारोप सुरू असतानाच, राज्यातील सर्वपक्षीय आमदार आज, सोमवारपासून लंडन दौऱ्यावर जाणार आहेत. या दौऱ्यात हे आमदार लंडन येथील वेल्स ट्रिनिटी सेंट डेव्हिड विद्यापीठाला भेट देणार असून, त्याठिकाणी सुशासन आणि सार्वजनिक धोरणाचा अभ्यास करणार आहेत. दरम्यान, रविवारी मध्यरात्री हे आमदार या दौऱ्यासाठी रवाना झाले.
लंडन दौऱ्यात १२ आमदारांचा समावेश
लंडन दौऱ्यासाठी जवळपास १२ आमदारांचा समावेश आहे. २० ते २५ नोव्हेंबर या कालावधीसाठी हा दौरा असणार आहे. या आमदारांमध्ये भाजपचे अमित साटम, मिहीर कोटेचा, जयकुमार रावल, पंकज भोयर, मंगेश चव्हाण तर शिवसेनेचे (उद्धव बाळासाहेब ठाकरे) विरोधी पक्षनेते अंबादास दानवे, काँग्रेसचे अमिन पटेल, झीशान सिद्दिकी, अमित झनक, अस्लम शेख तसेच समाजवादी पक्षाचे रईस शेख, अपक्ष सत्यजित तांबे यांचा समावेश आहे.
दौऱ्यात काय-काय करणार?
या दौऱ्यात हे सर्व आमदार कार्डिफमधील सेनेड असेंब्लीला आणि वेस्टमिन्स्टर येथील संसदेच्या सभागृहांनाही हे आमदार भेट देणार असून, येथील व्हाइट हॉलमधील नॅशनल लिबरल क्लबमध्ये या दौऱ्याची सांगता होणार आहे. ‘सुशासन आणि सार्वजिक धोरण’ या विषयाचे धडे गिरवणार आहेत. याशिवाय वेल्स विद्यापिठाच्या लॅम्पीटर कॅम्पसमधील विविध सांस्कृतिक कार्यक्रमात सहभागी होणार आहेत. विशेष म्हणजे, मंत्री आणि नेत्यांच्या विदेश वारीवरून ठाकरे गटाने टीकेची झोड उठवली होती. आता ठाकरे गटाचे नेते देखील सत्ताधारी आमदारांसोबत लंडनवारी करणार आहेत.
आदित्य ठाकरे यांनी शिंदे गटातील मंत्र्यांच्या परदेश दौऱ्यांवरुन रान उठवले होते. त्यामुळे शिंदे गट कोंडीत सापडला होता. आता सर्वपक्षीय आमदार लंडन दौऱ्यावर गेले आहेत. यात भाजप, शिवसेना, शिवसेना ठाकरे गट, काँग्रेस आणि समाजवादी पक्षाच्या आमदारांचा समावेश आहे.
