मुंबई: आज 19 मार्च 2026, चैत्र शुद्ध प्रतिपदा. आजपासून भारतीय संस्कृतीतील अत्यंत महत्त्वाच्या ‘विक्रम संवत 2083’ या हिंदू नववर्षाला सुरुवात होत आहे. गुढीपाडवाच्या उत्साहात सुरू होणारे हे वर्ष केवळ कॅलेंडर बदलण्याचे प्रतीक नसून, ते खगोलीय गणना आणि ऐतिहासिक विजयाचा वारसा सांगणारे आहे.
राजा गुरु तर मंत्री मंगळ!
ज्योतिषीय गणनेनुसार, या नवीन वर्षाचे नाव ‘रौद्र संवत्सर’ असे आहे. यंदाच्या वर्षाचे मंत्रिमंडळही रंजक आहे; या वर्षाचा ‘राजा’ देवगुरु बृहस्पती (गुरु) आहे, तर ‘मंत्री’ मंगळदेव आहे. जेव्हा गुरु आणि मंगळ सत्तेत असतात, तेव्हा समाजात धार्मिक जागृती वाढते, पण प्रशासकीय स्तरावर मोठे चढ-उतार आणि सत्ताधाऱ्यांमध्ये मतभेदाचे वारे वाहण्याची शक्यता असते. ‘रौद्र’ नावाप्रमाणेच हे वर्ष काहीसे आक्रमक आणि बदलांचे ठरू शकते.
सुरुवातीला काही काळ पावसाची ओढ आणि महागाईचा चटका जाणवू शकतो, मात्र भाद्रपद महिन्यात वरुणराजाची कृपेने शेतकऱ्यांना दिलासा मिळेल. 2026 मध्ये दोन सूर्यग्रहणे आणि एक चंद्रग्रहण होणार आहेत.विशेष म्हणजे, यंदा ज्येष्ठ महिना ‘अधिक मास’ (पुरुषोत्तम मास) म्हणून येणार आहे. याचा अर्थ यंदा हिंदू वर्ष 13 महिन्यांचे असेल, जे आध्यात्मिक साधना आणि दानधर्मासाठी अत्यंत फलदायी मानले जाते.
हिंदू नववर्ष हे ‘साडेतीन मुहूर्तांपैकी’ एक पूर्ण मुहूर्त आहे. त्यामुळे आजच्या दिवशी केलेली कोणत्याही नवीन कामाची सुरुवात, गुंतवणूक किंवा संकल्प हा दीर्घकालीन यश देणारा ठरतो. ज्योतिषीय आव्हाने असली तरी भारताची जागतिक घोडदौड आणि व्यापार क्षेत्रात सकारात्मक वाढीचे संकेत प्रबळ आहेत.
