दिल्ली : एका १८ वर्षांच्या तरुणीने घरात पूजा ठेवली असल्यामुळे मासिक पाळी (पिरियड्स) पुढे ढकलण्यासाठी हार्मोनल गोळ्या घेतल्या, ज्यामुळे तिचा मृत्यू झाला आहे. ही घटना खूपच दुःखद आणि धक्कादायक आहे. या तरुणीने गोळ्या घेतल्यानंतर तिला प्रचंड वेदना होऊ लागल्या होत्या. तिच्या पायांमध्ये आणि मांड्यांमध्ये सूज आली होती. अशा परिस्थितीत ती अस्वस्थ होऊन मैत्रिणींसह डॉक्टरांकडे गेली, जिथे तिच्या स्कॅनमध्ये थ्रोम्बोसिसची स्थिती आणि तिच्या नाभीजवळ गाठ दिसून आली.
डॉक्टरांनी तिला ताबडतोब रुग्णालयात दाखल होण्याचा सल्ला दिला, पण तिच्या वडिलांनी नकार दिला आणि सांगितले की तिची आई उद्या तिला घेऊन येईल. मात्र, मध्यरात्री २ वाजता तिला आपत्कालीन वॉर्डमध्ये दाखल करण्यात आले. तिला श्वास घेण्यास त्रास होत होता आणि यात तिचा मृत्यू झाला. ही घटना व्हस्क्युलर सर्जन डॉ. विवेकानंद यांनी त्यांच्या रीबूटिंग द ब्रेन पॉडकास्टमध्ये सांगितली, यावेळी त्यांनी डीप व्हेन थ्रोम्बोसिस ही स्थिती पायांमध्ये रक्ताची गुठळी तयार होण्यास कारणीभूत ठरते असे सांगितले.
ही घटना वैद्यकीय सल्ल्याकडे दुर्लक्ष करण्यामुळे झाली असून, हार्मोनल गोळ्यांचा अतिउपयोग धोकादायक असल्याचे दर्शवते. दरम्यान, ही घटना कधी घडली याची तारीख समोर आली नसली तरी देखील या घटनेने सोशल मीडियावर एकच खळबळ उडाली आहे.
