Yavat News यवत, ता. १८ : पुणे-सोलापूर राष्ट्रीय महामार्गावरील वाढत्या वाहतूक कोंडी, अपघात आणि बेशिस्त वाहनचालकांवर अखेर यवत पोलिसांनी कडक कारवाईचा बडगा उगारला आहे. आठवडी बाजाराच्या पार्श्वभूमीवर सुरू असलेल्या विशेष वाहतूक मोहिमेदरम्यान महामार्गाच्या सर्व्हिस रोडवर वाहने बेवारसपणे उभी करून वाहतुकीला अडथळा निर्माण करणाऱ्या चालकांवर पोलिसांनी गुन्हे दाखल केले आहेत. यासोबतच मद्यप्राशन करून दुचाकी चालवणाऱ्या चालकावरही थेट कारवाई करण्यात आली आहे. या धडक मोहिमेमुळे नियमभंग करणाऱ्या वाहनचालकांमध्ये मोठी खळबळ उडाली आहे. Yavat News
भाऊसो महादेव जाधव (रा. म्हसोबा चौक, यवत), सदाशिव तुकाराम गायकवाड (रा. भांडगाव, ता. दौंड), सिद्धार्थ रामचंद्र कदम (रा. भांडगाव, ता. दौंड) व रविंद्र बाळू फुले (रा. दुधाने चौक, यवत) अशी गुन्हा दाखल करण्यात आलेल्यांची नावे आहेत. Yavat News
पोलिसांनी दिलेल्या माहितीनुसार, पोलीस अंमलदार दिनेश शिवाजी पोळ, पोलीस हवालदार पी. आर. शिंदे आणि पोलीस अंमलदार ए. आर. जाधव हे यवत गावातील आठवडी बाजारामुळे पुणे-सोलापूर महामार्गावरील वाहतूक नियंत्रण आणि नियमभंग करणाऱ्यांवर कारवाई करत होते. यावेळी बिकानेर स्वीट होम समोरील सर्व्हिस रोडवर अनेक वाहने बेवारस अवस्थेत उभी असल्याचे त्यांच्या निदर्शनास आले. Yavat News
पहिल्या कारवाईत टाटा मॅजिक (एमएच 42 के 0173) ही गाडी रस्त्याच्या मधोमध उभी करून चालक पसार झालेला आढळला. पोलिसांनी परिसरातील नागरिकांकडे चौकशी केली असता चालक भाऊसो महादेव जाधव (रा. म्हसोबा चौक, यवत) असल्याचे समोर आले. वाहतुकीस अडथळा निर्माण करून मानवी जीवितास धोका निर्माण केल्याप्रकरणी त्याच्यावर बीएनएस कलम २८५ अंतर्गत गुन्हा दाखल करण्यात आला.
त्यानंतर काही वेळातच त्याच परिसरात दुसरी टाटा मॅजिक (एमएच 42 एमएफ 6150) ही गाडीही बेवारस अवस्थेत उभी असल्याचे दिसून आले. चौकशीत चालक सदाशिव तुकाराम गायकवाड (रा. भांडगाव, ता. दौंड) असल्याचे निष्पन्न झाले. त्याच्याविरोधातही पोलिसांनी गुन्हा दाखल केला आहे.
याच मोहिमेदरम्यान बजाज मॅक्सीमा रिक्षा (एमएच 12 डब्ल्यूआर 2603) रस्त्यावर धोकादायक पद्धतीने उभी करून चालक निघून गेल्याचे आढळून आले. संबंधित चालक सिद्धार्थ रामचंद्र कदम (रा. भांडगाव, ता. दौंड) याच्यावरही कारवाई करण्यात आली.
दरम्यान, वाहतूक तपासणी सुरू असताना पोलिसांना एक दुचाकीस्वार वेडीवाकडी गाडी चालवत असल्याचे दिसून आले. पोलिसांनी त्याला थांबवून चौकशी केली असता तो रविंद्र बाळू फुले (रा. दुधाने चौक, यवत) असल्याचे समोर आले. त्याच्या तोंडाला मद्याचा तीव्र वास येत असल्याने त्याची वैद्यकीय तपासणी करण्यात आली. तपासणीत त्याने मद्यप्राशन केल्याचे स्पष्ट झाल्यानंतर मोटार वाहन कायदा कलम १८५ अंतर्गत त्याच्यावर गुन्हा दाखल करण्यात आला. या कारवाईमुळे महामार्गावर वाहतूक नियम मोडणाऱ्या चालकांमध्ये भीतीचे वातावरण निर्माण झाले असून, यवत पोलिसांकडून पुढील काळातही अशीच कठोर मोहीम राबवली जाणार असल्याचा इशारा देण्यात आला आहे.
