पिंपरी : रूग्णवाहिकेत बसलेल्या महिला डॉक्टरशी गैरवर्तणूक करत तिचा विनयभंग केल्याप्रकरणी रूग्णवाहिका चालकासह मदतनीसावर आळंदी पोलीस ठाण्यात गुन्हा दाखल करण्यात आला आहे. हा प्रकार ३० नोव्हेंबर ते १० डिसेंबर २०२३ या दरम्यान आळंदी येथे घडला.
मदतनीस गोरखनाथ दराडे (वय ४०) व चालक शिवप्रसाद ससाणे (वय ४१) या दोघांवर गुन्हा दाखल करण्यात आला आहे. ३८ वर्षीय डॉक्टर महिलेने आळंदी पोलीस ठाण्यात फिर्याद दिली आहे. फिर्यादी महिला डॉक्टर या तातडीच्या सेवेसाठी उपलब्ध असलेल्या १०८ क्रमांकाच्या रूग्णवाहिकेत नोकरी करतात. ३० नोव्हेंबर रोजी चालकाशेजारील आसनावर बसल्या असताना गोरखनाथ याने महिलेसोबत अश्लील वर्तन करत अश्लील शेरेबाजी केली.
शिवप्रसाद यानेही १० डिसेंबर रोजी रूग्णवाहिकेत डॉक्टर महिलेशी गैरवर्तन केले. तसेच, त्यांना शिवीगाळ करत ‘मी सर्पमित्र असून माझी तक्रार केली तर तुझा खेळ खल्लास करीन’ अशी धमकी दिली. या दोन्ही प्रकारानंतर महिला डॉक्टरने आळंदी पोलीस ठाण्यात धाव घेतली. फौजदार गायकवाड अधिक तपास करीत आहेत.
