मुंबई : छत्रपती संभाजीनगर येथील तलाठी पेपर फुटी प्रकरणात मूळ पेपर हा नागपुरातून फोडण्यात आला असल्याचे पोलीस तपासात समोर आलं आहे. नागपूरमधील एका परीक्षा केंद्रावरून पेपर फोडून त्याचे प्रश्न हे छत्रपती संभाजीनगरच्या परीक्षा केंद्रावर पाठवण्यात आल्याचं तपासात स्पष्ट झाले आहे. सध्या पोलीस याचा अधिक तपास करत आहेत.
महाराष्ट्रात तलाठी भरती परीक्षा 17 ऑगस्ट ते 14 सप्टेंबर दरम्यान घेण्यात आली होती. यामध्ये 5 सप्टेंबर रोजी तलाठी भरतीचा पेपर फुटला होता. छत्रपती संभाजीनगर येथील टीसीएस आयओएन केंद्रातील पर्यवेक्षकाने उमेदवारांना उत्तरे पुरविली होती. मात्र, प्रत्यक्षात याचा सखोल तपास छत्रपती संभाजीनगर पोलिसांनी केल्यानंतर नागपूरच्या एका परीक्षा केंद्रावरून परीक्षा देणाऱ्या उमेदवाराने तलाठीचा पेपर फोडून या पर्यवेक्षकाला प्रश्न पाठवल्याचे निष्पन्न झाले. त्यामुळे नागपूरमधून हा पेपर फोडून किती परीक्षा केंद्रावर पाठविण्यात आला? असा प्रश्न आता स्पर्धा परीक्षा समन्वय समितीने विचारला आहे.
दरम्यान नाशिक येथील परीक्षा केंद्रावर गणेश गुसिंगे या अट्टल पेपरफोड्याने तलाठीचा पेपर फोडला होता. त्याचे चार्जशीट मागील आठवड्यापर्यंत दाखल करण्यात आले नव्हते. म्हणजे या घोटाळ्याच्या मूळापर्यंत कोण होते, ही साखळी नक्की कोणापर्यंत पोचत आहे, याबद्दल सर्वसामान्य उमेदवारांना काहीही माहिती नाही.
जर घोटाळ्याचा तपासच अजून पूर्ण झाला नाही, तर निकाल कशाचा जाहीर करत आहात? घोटाळेबाजाची निवड झाल्यास त्याची जबाबदारी महसूल अपर सचिव किंवा महसूल मंत्री घेतील काय? असा सवाल स्पर्धा परीक्षा समन्वय समितीकडून विचारला जात आहे.
