दिल्ली : कॉकरोच जनता पार्टीने केंद्रीय मुख्य निवडणूक आयुक्त ज्ञानेश कुमार यांच्या राजीनाम्याची मागणी करत उद्या जंतरमंतरवर तीव्र निदर्शने करण्याचा इशारा दिला आहे. या आंदोलनामुळे राजधानी दिल्लीतील राजकीय वातावरण तापले असून, सुरक्षेच्या कारणास्तव दिल्ली पोलिसांनी नवी दिल्लीतील काही भागांत 24 तासांसाठी इंटरनेट सेवा बंद ठेवण्याचा मोठा निर्णय घेतला आहे.
केंद्रीय गृह मंत्रालयाने या निर्णयाला मंजुरी दिली असून, दिल्ली पोलीस प्रशासनाने संबंधित टेलिकॉम कंपन्यांना या आदेशाची तात्काळ अंमलबजावणी करण्याचे निर्देश जारी केले आहेत. या आदेशानुसार, 9 ऑक्टोबर रोजी रात्री 10 वाजल्यापासून ते शनिवारी, 10 ऑक्टोबर रोजी रात्री 10 वाजेपर्यंत जनपथ आणि कर्तव्य पथ चौकाच्या 4 किलोमीटर परिघात मोबाईल इंटरनेट डेटा सेवा पूर्णपणे स्थगित राहील.
सुरक्षेचा उपाय म्हणून जारी करण्यात आलेल्या या निर्देशांनुसार रिलायन्स जिओ, एअरटेल, व्होडाफोन-आयडिया आणि एमटीएनएल या सर्व प्रमुख दूरसंचार कंपन्यांना या परिसरातील डेटा सेवा तात्पुरती बंद ठेवण्याचे स्पष्ट आदेश दिले आहेत. जंतरमंतरवरील संभाव्य गर्दी आणि कायदा व सुव्यवस्थेचा प्रश्न निर्माण होऊ नये, यासाठी हा सुरक्षेचा प्रतिबंधात्मक मार्ग अवलंबण्यात आला आहे.
