मुंबई : देशाची आर्थिक राजधानी असलेल्या मुंबईतील सुप्रसिद्ध ताज हॉटेलला बॉम्बने उडवून देण्याची धमकी मिळाल्याने रविवारी मध्यरात्री पोलीस आणि सुरक्षा यंत्रणांची धावपळ उडाली. “अंडरवर्ल्ड डॉन दाऊद इब्राहिमने ताज हॉटेलमध्ये बॉम्ब ठेवला आहे,” असा खळबळजनक फोन आल्याने मध्यरात्री पोलीस प्रशासनात हाय अलर्ट जारी करण्यात आला होता. मात्र, तासाभराच्या कसून तपासणीनंतर हा फोन निव्वळ अफवा असल्याचं समोर आलं आहे. यानंतर पोलिसांनी सुटकेचा निश्वास सोडला.
मिळालेल्या माहितीनुसार, रविवारी मध्यरात्री सुमारे १२ वाजून १३ मिनिटांनी नवी मुंबई पोलिसांच्या नियंत्रण कक्षाला एका अज्ञात व्यक्तीचा फोन आला. फोनवरील व्यक्तीने “दाऊदने ताज हॉटेलमध्ये बॉम्ब ठेवला आहे,” अशी थेट माहिती दिली आणि फोन कट केला. प्रकरणाचे गांभीर्य आणि संवेदनशीलता लक्षात घेऊन नवी मुंबई पोलिसांनी हा संदेश तत्काळ मुंबई पोलिसांच्या मुख्य नियंत्रण कक्षाला फॉरवर्ड केला.
माहिती मिळताच दक्षिण मुंबईतील कोलाबा पोलीस, गुन्हे शाखा आणि बॉम्ब शोधक व नाशक पथक तत्काळ ताज हॉटेलमध्ये दाखल झालं. मध्यरात्रीच हॉटेलमध्ये मोठी शोधमोहीम हाती घेण्यात आली. हॉटेलची मुख्य लॉबी, स्विमिंग पूल परिसर, विविध बॉलरूम्स, हॉल्स आणि रेस्टॉरंट्स, पार्किंग तळ, हॉटेलचा बाहेरील परिसर आणि इतर संवेदनशील ठिकाणांची कसून तपासणी करण्यात आली.
बराच वेळ चाललेल्या या तपासणीत कोणतीही संशयास्पद वस्तू किंवा स्फोटकं आढळून आली नाहीत. त्यामुळे पोलिसांनी ही धमकी फोल असल्याचं जाहीर केलं. धमकीचा फोन आल्यानंतर मुंबई आणि नवी मुंबई पोलिसांनी तांत्रिक तपास वेगाने सुरू केला. तांत्रिक विश्लेषणावरून हा धमकीचा कॉल नवी मुंबईतील तुर्भे परिसरातून करण्यात आल्याचं स्पष्ट झालं आहे. पोलिसांनी त्या मोबाईल क्रमांकाच्या आधारे कॉल करणाऱ्या व्यक्तीची ओळख पटवली आहे.
सध्या आरोपीचा माग काढण्यासाठी मुंबई पोलिसांचं पथक तुर्भे पोलिसांच्या मदतीने परिसरात छापे टाकत असून, या खोडसाळ प्रवृत्तीच्या आरोपीला लवकरच अटक केली जाईल, असा विश्वास पोलिसांनी व्यक्त केला आहे. या घटनेमुळे काही काळ ताज हॉटेल परिसरात तणावाचं वातावरण निर्माण झालं होतं
