पुणे : पुण्यातील चर्चित केतन अग्रवाल हत्या प्रकरणाला वेगळे वळण मिळाले आहे. या प्रकरणातील मुख्य आरोपी सिया गोयल आणि तिच्या साथीदाराने अत्यंत नियोजनबद्ध आणि थंड डोक्याने कट रचल्याचे पोलीस तपासात उघड झाले आहे. त्यानंतर आता एका नेल आर्टिस्ट मैत्रीणीनं धक्कादायक खुलासा केला आहे.
मिळालेल्या माहितीनुसार, आरोपी सियाने तिच्या एका नेल आर्टिस्ट मैत्रिणीचे फोटो तिच्या संमतीशिवाय चोरले आणि ‘माही जे’ या नावाने बनावट इन्स्टाग्राम खाते तयार केले. या बनावट खात्यावरून केतनशी संपर्क साधून “सियाच्या वाढदिवसाच्या आदल्या दिवशी तिला लोहगडावर सरप्राईज पार्टी देऊया,” असे आमिष त्याला दाखवण्यात आले. या बहाण्याने केतनला लोहगडावर बोलावून आरोपींनी त्याची निर्घृण हत्या केली.
ज्या वेळी हे बनावट खाते बनवले गेले, त्या वेळी त्या नेल आर्टिस्ट मैत्रिणीची कौटुंबिक परिस्थिती अत्यंत नाजूक होती. तिचा पती अंमली पदार्थ प्रकरणात तुरुंगात होता आणि लहान बाळाची संपूर्ण जबाबदारी तिच्यावरच होती. तिच्या या असहायतेचा फायदा घेत आरोपींनी तिला “तोंड बंद ठेव” अशी थेट धमकी दिली होती. बाळ पाठीशी असल्याने ती महिला सुरुवातीला प्रचंड घाबरली. परंतु, हत्येची बातमी समोर आल्यावर तिने आईशी चर्चा केली आणि पती तुरुंगातून बाहेर येताच थेट पोलिसांकडे धाव घेतली. तिच्या या जबाबाने तपासाला अत्यंत महत्त्वाचा पुरावा मिळवून दिला.
केतनचे वडील विशाल अग्रावाल यांनी या प्रकरणात नवीन आणि खळबळजनक दावा केला आहे. सिया आणि तिचा साथीदार चेतन यांच्यात ‘हबी-वायफी’ अशा नात्याने संभाषण चालत होते आणि त्यांनी एकमेकांना लग्नाच्या वाढदिवसाच्या शुभेच्छाही दिल्या होत्या. हे दोघे आधीच विवाहित होते का, या दृष्टीने पोलीस सध्या सादर केलेल्या 5,300 पानांच्या दोषारोपपत्राच्या आधारे सखोल तपास करत आहेत.
